Улуг-Хем кожууннуң Арыг-Үзүү сумузунга "Тергиин кыргыкчы-2025" мөөрейи болуп эрткенин сумунуң херээженнер чөвүлелиниң даргазы Валентина Сайзан-оол дыңнаткан. Кожууннуң удуртулгазы кыргыкчыларга байыр чедирген.
Кыргыкчылар мөөрейин "Аныяк өг-бүлеге – кыштаг" төлевилелдиң киржикчизи Байыр Соянның Даг-Ужу деп черде аалынга эрттирерген. Кожуун чергелиг мөөрейге Торгалыгдан, Эйлиг-Хемден, Арыскандан, Иштии-Хемден болгаш чыынды командалар кыштагга чыглып келген.
Мөөрейниң негелделери езугаар хойну арыг, шынарлыг болгаш балыг-бышкын чокка кыргыыр. Команданың ниитизи-биле каш баш хойну кыргаанын база санаар. Командада ийи эр, ийи херээжен кыргыкчы бар. Хачызын, шарып-хүлүүр аргамчызын кыргыкчы бүрүзү боду чепсегленип алгаш келген.
Кыргылда үезинде шалыпкын кыргыкчылар дораан илереттинип үнүп келген. Эр кыргыкчылардан Эйлиг-Хем командазының кежигүнү Рафик Биче-оол бир хойну 7 минута 1 секунда кыргааш, тиилээн. Эйлиг-Хемден кыргыкчы Оңмас Монгуш-оол хойну 8 минута кыргааш, ийиги черни алган. Арыскандан Айдыс Кунгаа (8 минута 30 секунда), Эйлиг-Хемден Айдың Биче-оол (9 минута 30 секунда) олар үшкү-дөрткү черни үлешкен.
Херээжен кыргыкчылардан Эйлиг-Хемден Чодураа Кыргыс хойну 6 минута 48 секунда кыргааш, тиилекчи болган. Эйлиг-Хемден Азиймаа Кыргыс (20 минута), Арыскандан Алдынай Чульдум, Шончалай Донгак 2-3-4-кү черлерни алганнар. Тергиин кыргыкчыларны акша болгаш суй-белектер-биле шаңнаан.
Команда аайы-биле мөөрейге 200 хой арттырып каан турган. Ол хойларны келген командаларга деңге салыптарга, бир командага-ла 33 баш онаашкан. Эйлиг-Хемниң командазы 33 хойну мурнай-ла кыргааш, бир дугаар черни чаалап ап, ирт-биле шаңнаткан. Ийиги черге Арысканның кыргыкчылары төлептиг болгаш, оларның шаңналы – ирт. Торгалыгның командазы үшкү черни чаалап алгаш серге-биле шаңнаткан.
Күш-ажыл мөөрейинге киржип келген командаларны болгаш аалчыларны аалдың ээзи – аныяк малчын Байыр Соян хойну дөгерип, изиг-ханнадып, хүндүлээн.
Кыргыкчылар аныяк малчынның элээн хөй хоюн кыргыырынга үлүг-хуузун киириштирген. Күш-ажыл мөөрейи солун болгаш ажыктыг эрткенин киржикчилер демдеглээн.
Бо чылгы кыргыкчылар мөөрейин Арыг-Үзүү сумузунуң херээженнер чөвүлели эрттирген.
