Тывада көдээ суурлар аразында «Элээр суур» мөөрейинге республиканың шупту кожууннарындан ниитизи-биле 40 суур киришкен.
Бии-Хем, Тес-Хем база Чөөн-Хемчик кожууннардан мөөрейге киржир эң хөй чагыглар кирген. Түңнелдерни үндүрерде Россия Федерациязының Тыва Республика талазы-биле иштики херектер яамызының сан-чурагайларын көрүп, демдектерни салган.
ТР-ниң Чазак Даргазының оралакчызы Айдыс Сынаа республиканың суурларында эзирик байдалдыг кижилерниң үүлгедиглерин эвээжедиринче мөөрейни угландырганын демдеглээн.
Тывада бүрүткеттинген кем-херектерниң ниити саны 4,2 хууга эвээжээнин 2024 чылдың түңнелдери көргүскен. Эзирик байдалдыг үүлгеткен херектер саны 10 хуу кызырылган. Хөй-ниити черлеринге 2023 чылда 1551 кем-херек үүлгедии болган болза, ооң саны 1370-де келген.
Улуг суурлар аразындан Бии-Хем кожууннуң Сесерлиг сууру бирги черни ээлээн болза, ийиги черни Чөөн-Хемчиктиң Хөндергей сууру, үшкү черни – Барыын-Хемчиктиң Аксы-Барлык сууру үлешкен.
Ортумак чурттакчылыг черлер аразындан бирги черни Улуг-Хем кожууннуң Арыскан суур, Бии-Хем кожууннуң Тарлаг суур ийиги черни, Сүт-Хол кожууннуң Кызыл-Тайга суур үшкү черлерни ээлээннер.
Биче чурттакчылыг черлер аразынга Мөңгүн-Тайга кожууннуң Тоолайлыг суур тиилээн.
