Чеди-Хөл кожууннуң Элегес сумузунда биче хемчээлдиг спорт залы ажыттынганын ТР-ниң Спорт яамызы дыңнаткан. Ук объектини «Эзирлерниң уязы» төлевилел-биле тудуп үндүрген.
Чеди-Хөл кожууннуң чагырга даргазы Адыгжы Араптан элегесчилерге байырын чедиргеш, кожуунда өзүп орар салгалдарның аразынга спорт болгаш күш-культура сайзырадырының талазы-биле айтырыгларже шыңгыы кичээнгейни угландырып турарын демдеглээн.
Тываның Спорт яамызының дыңнадып турары-биле алырга, бо чылын республикага он биче база ийи ангар хевирлиг спорт залдарының тудуу планнаттынган. Бо хүнде Тес-Хем кожууннуң Берт-Дагда, Чөөн-Хемчик кожууннуң Чыргакыда, Бии-Хем кожууннуң Найырал арбанында, Чеди-Хөл кожууннуң Элегес сумузунда келир үениң мөгелерин өстүрүп кижизидер спорт залдары ажыттынган.
Танды кожууннуң Кызыл-Арыгда, Улуг-Хем кожууннуң Ийи-Талда, Сүт-Хөл кожууннуң Бора-Тайгада объектилер тудуу доостур чадазында.
ТР-ниң Спорт яамызының, кожууннуң чагырга чериниң база күш-ажылчы коллективтерниң болгаш элегесчилерниң демниг ажылының түңнелинде спорт залын үе-шаанда доозуп, ажыглалче кииргени бо.
