Тыва үндезин культура төвүнге республиканың ховар кижилериниң бирээзи – тыва идик даараар болгаш хөм-биле ажылдаар ус-шевер өг-бүле Уранхай биле Сайзанак Сарыгларларның «Элезе-даа, түрезе-даа чарылбас эжишкилер» деп чогаадыкчы ажыл-чорудулгазынга тураскааткан делгелгезиниң ажыдыышкыны байырлыг болуп эрткенин төп дыңнаткан.
Салым-чаяанныг өг-бүлениң чоок кижилери, чаңгыс чер-чурттуглары, кады ажылдап чоруур эш-өөрү чыглып, оларның чогаадыкчы ажыл-ижиниң үре-түңнели болур оюн-көргүзүглүг хууда делгелгезин сонуургап, байыр чедиргеннер.
Сайзанак Сергеевна 20 харлыындан эгелеп-ле тыва идикти даараарын сонуургап, ону кылырының аргаларын шинчилеп, шиңгээдип эгелээн. Ол-Санкт-Петербург хоорайга идик-хеп даараар талазы-биле дээди эртемни чедип алгаш, өөнүң ээзи Уранхай биле Тывага уттундуруп бар чыткан тыва идикти даараар мергежилди сергедир, сайзырадыр ажылын эгелээннер.
Бо хүннерде ус-шеверлер тыва идик даараар талазы-биле Тываның кол ус-шеверлери апарган дээр болза чазыг чок. Олар чоннуң чагыы-биле хөй санныг идиктерни даарап турарлар. Харын-даа даштыкы чурттардан тыва идикти үнелээн кижилерниң чагыын күүседип турар.
Шевер өг-бүлениң ажылдары 2019 чылда эрткен регион чергелиг «Мөңгүн кержек» ус-шевер мөөрейинге бедик үнелелди алган. Кызымак, чогаадыкчы ажыл-ижи база тыва үндезин культураны сайзырадырынга улуг үлүүн киирип чорууру дээш, хөй санныг хүндүткелдиг шаңнал-бижиктерниң эдилекчилери болуп чоруурлар.
Бо хүннүң маадырлары – Сарыгларларның ус-шевер өг-бүлези дыка хөй чылдар дургузунда кызымаккай ажылдап, боттарының мергежилин бедидип алгаш, ат-сураглыг спортчуларга, багжыларга, малчыннарга, артистерге, бүгү тыва чонга, ол ышкаш республиканың хүндүлүг аалчыларынга чаңчылчаан хол-биле кылган үндезин идиктерни даарап берип чоруурлар. Тыва үндезин культура төвү салым-чаяанныг ус-шевер өг-бүлеге четтиргенин илередип, чымыштыг ажыл-ижинге бедик үнеледи берген.
Тыва кижиниң долу кеттинген хевиниң чугула кезээ – идии. Тыва улустуң идиктер дугайында чиге сөглээн тывызыы бар «Элезе-даа, түрезе-даа чарылбас эжишкилер». Идик – Төп Азия чоннарында чажыт ыдык утканы бодунда сиңирген. Өске чоннарда ышкаш тыва чонда идик база өрү аастыг, буянныг эт кылдыр санаттынып чоруур.
