Тывада Эмчи Бурганының мандалазын кылыры-биле Индияның Сера Мей хүрээзинден лама-башкылар аалдап чедип келген.
Хүндүткелдиг Геше Джампа Тинлей Башкының дилээ-биле Текчен Тулку Ринпоче Башкыга удурткан лама-башкылар Эмчи Бурганының мандалазын “Манджушри” сарыг шажының төвүнде июль 27-ден эгелеп кылып эгелээн.
– Хүндүткелдиг Геше Джампа Тинлей Башкының ачы-хавыяазында Индиядан лама-башкылар чаларап кээп турарынга өөрүп тур бис.
Индиядан лама-башкылар Тывада үш дугаар чыл кээп турары бо. Бир дугаар 2017 чылда келген.
Геше Джампа Тинлей Башкы өөренип турган Сера Мей хүрээзинден Россияның чүдүкчүлеринге, ийи чыл болгаш-ла, аарыг-аржыкты чавырылдырары-биле Эмчи Бурганының мандалазын кылырын дилээн турган.
Республиканың чүдүкчү чону мандаланы көрүп, тейлеп, сүзүглеп кээп тур. Эмчи Бурганындан кайгамчыктыг күштүг айыс херелдер үнгеш, хинчек-човулаңга таваржып чоруур аарыг-аржык кижилеривиске болгаш бүгү-ле амылыг амытаннарга четчип турзун деп, арыг-чаагай бодал-биле чүдүп сүзүглээри чугула.
Мен Башкының 1993 чылдан тура хоочун өөреникчизи-дир мен – деп, чүдүкчү эне Алла Монгуш чугаалады.
Июль 2-де 11 шакта мандаланы бузар езулал болур. Ооң соонда айызаан ыдыктыг элезинни Эне-Сайже чаларадыр, чүдүкчүлерге үлээр.
Мандаланы “Манджушри” сарыг шажының төвүнде кылып турар. Кызыл хоорай, Рабочая кудумчузу, 97 дугаар бажың.
Номналдарның чуруму:
Июнь 30-де
17.00 шакта Гябши деп өргүл езулалы болур. Езулал берге байдалда аарып-аржып, аас-дылда таваржып турар, акша-хөреңги болгаш хоойлу-дүрүм талазы-биле берге байдалда кижилерге дузаны кадар, база ол ышкаш каракка көзүлбес хоралыг амытаннардан камгалаар.
Июль 1-де
9.00 шакта Эмчи Бурганның номналы болур. Мандала тудуу хүн дургузунда уламчылаар. Номнал аарыг-аржыктың човулаңындан камгалаар, саарзыкталып, куюмнаан сеткилди оожуктурар, хей-аът бедидер.
15.00 шакта Эмчи Бурганның айызын бээр езулал болур. Езулал янзы-бүрү аарыглардан аарып турар улуска болгаш кежик-чол доктаадырынга улуг дузалыг.
Июль 2-де
11.00 шакта мандаланы бузар, чонга үлээр езулал болур.
Июль 3-те
15.00 шакта Каа-Хемде “Махаяна” шажын төвүнге узун назынның бурганы Ак Дарийгиниң айызын дамчыдар езулал болур. Езулалга киржирге, күш-шыдал, мерген угаан көвүдээр.
Июль 4-те
18.00 шакта Улусчу чогаадылга бажыңынга 21 Дарийгиниң улуг номналы болур.
