Бии-Хем кожууннуң Аржаан сумузундан "Энелер" хоочуннар чөвүлелиниң кежигүннери чылдың-на часкы тарылга ажылдарынга ыяк белеткенип алырын чагырга чери дыңнаткан.
Сумунуң арга-дуржулгалыг ногаажылары – Галина Ооржак, Светлана Сумбакай, Тамара Маады, Ольга Чамбал ногаа аймаан, картофельди четчир кылдыр тарып, элбек дүжүттү ажаап алыр чаңчылдыг. Ол ышкаш кат-чимистен варенье хайындырып, мөөгү дузап, курлавырлап алырлар.
Энелер аныяндан тура огород ажылынга сонуургалдыг. Оларның тарып алган өзүмнери шору өзүп келген. Хүндүлүг дыштанылгада хоочуннар хостуг үезинде суурнуң, кожууннуң амыдыралынга идепкейлиг киржип турар.
Май байырлалдарының эгезинде арга-дуржулгалыг хоочуннар аныяк-өскенге мастер-классты эрттиргеш, артыкшылдыг ногаа өзүмнери-биле үлежирлер.
