Бии-Хем кожууннуң «Энерелдиг сеткилдиң оруу» ачы-дуза фондузунуң директору Наталья Ондар кожууннуң хоочуну Александра Константиновнага Март 8-биле байыр чедирген.
Сезен дөрт харлыг эне Шивилиг суурнуң кызыгаарының чоогунда Кара-Суг деп черге төрүттүнген. Ооң ачазы Константин Андреевич Ткач Ада-чурттуң Улуг дайынының хоочуну.
Хоочун бүгү назынында банкыга кассирлеп ажылдап, бараан болган. Ак сеткилдиг болгаш үре-түңнелдиг ажылы дээш «Россияның банкызының 150 чыл ою», «1941-1945 чылдарда Ада-чурттуң Улуг дайынынга Тиилелгениң 75 чылы» юбилейлиг медальдар-биле шаңнаткан.
Александра Константиновнаның назы-хары чеже-даа дөгүй берген болза, ол амыдыралдың кадык овур-хевирин шилип, спорттуң скандинав кылаш хевиринге сонуургалдыг. Хүнде дөрт киломерт орукту эртип турар.
Хоочун эне тускай шериг операциязында дайынчы оолдарны деткип, пенсиязының чамдык кезиин шилчидип турарын Наталья Ондар дыңнаткан.
Спортчу, энерел сеткилдиг, аныяк-өскенге эки үлегер-чижээн көргүзүп чоруур эне-биле аяк-шайны аартап ора, аңаа частың чечектерин болгаш чигирзиг белекти тыпсып, быжыг кадыкшылды ачы-дуза фондузунуң директору күзээн.
