Национал школа хөгжүдер институт эртем адырының бүгү төлээлекчилеринге Россияның эртем хүнү-биле байырны чедирген.
– Бөгүн бистиң чуртувуста Эртем хүнүн демдеглеп турар. Эртем – сайзыралдың, бурунгаар хөгжүлдениң, депшилгениң кол шимчедикчи күжү болгаш магадылалы. Эртем чоннуң даартагы хүнге, келир үеге бүзүрели болгаш идегели-биле сырый холбаалыг, ол кижи төрелгетенниң амыдырал-чуртталгазын экижидер болгаш иштики делегейин – сагыш-сеткилин, мөзү-шынарын хевирлээр чаагай сорулгалыг.
Бөгүнгү байырлыг хүнде эртем-шинчилел ажылынга чүрээнден шынчы бердинген улуг эртемденнеривиске, ылаңгыя тыва эртемни бедик тудуп чоруур шинчилекчилеривиске, башкыларывыска, оларның соон изээн аныяк шинчилекчилеривиске болгаш бүгү-ле эгин кожа ажылдап чоруурувус эртем ажылдакчыларынга магадалдың, чоргааралдың, өөрүп четтириишкинниң болгаш мөгейигниң сөстерин илереттивис.
Эртемниң чаа-чаа бедиктеринге чедерин, дегдинмээн чүм чыдар адырларны шиңгээдип, чонувустуң, чуртувустуң хөгжүлдези дээш карак кызыл ажыл-ижинге чедиишкиннерни, аас-кежикти, быжыг кадыкшылды, амыр-тайбыңны күзедивис!
