Сүт-Хөл кожууннуң уругларның үлегер-майыктың ном саңынга Тываның Улустуң чогаалчызы, «Делегейниң дириг эртинези» болгаш «Хам чүдүлгениң дириг эртинези» деп хүндүлүг аттарның эдилекчизи, төөгү эртемнериниң доктору Монгуш Кенин-Лопсанның мугур 100 харлаанынга тураскааткан чогаал байырлалын эрттиргенин ном саңы дыңнаткан.
Ном саңының ажылдакчылары эртемден, шинчилекчи, этнограф өгбениң 100 харлаанга тураскааткан «Чаяан-салымныг этнограф» деп кожуун чергелиг номчулга мөөрейин бедик деңнелге эрттирген.
Мөөрей ийи аңгы бөлүкке болуп эрткен. Ниитизи-биле 20 улуг-биче мөөрейжи киришкен.
Бирги бөлүктүң бөлүктүң тиилекчизи – Бора-Тайга школазының өөреникчизи Очур-Маадыр Ховалыг. Ийиги черде Бора-Тайга школазындан Айсурэна Ховалыг, үшкү черде Алдан-Маадыр школазындан Тана Ооржак.
Ийиги бөлүктүң тиилекчизи – Кудерек Монгуш. Ийиги-үшкү черлерге Юлия Кужугет биле Айлана Ондар төлептиг болган.
Киржикчи бүрүзүн тус-тузунда тускай шаңналдар-биле демдеглээн. Өөреникчилерин мөөрейге белеткээн башкыларга ном саңының ажылдакчылары Өөрүп четтириишкин бижиктерин тывыскан.
