Эзирик автомашина башкарганы дээш ажылындан хостаарының дугайында

Тываның күрүне албан-хаакчыларының эзирик машина башкарганы дээш ажылындан хостаар дугайында эгелээшкинин РФ-тиң Күрүне Думазынче киирген.

Тываның Баштыңы Владислав Ховалыг бүгү-делегейде орук озал-ондаандан когарааннарга сактышкыын хүнүнде орук озал-ондактарынга боттарының чоок болгаш төрээн кижилерин чидирген республиканың чурттакчыларынга кажыыдалын илереткен.
Бо чылын орук озал-ондактарынга чүс ажыг кижи мөчээн, алды чүс хире кижи кемдеп-берттирген.

Орук озал-ондааның дөрттүң бири-ле эзирик чолаачыларның хайы-биле болуп турар. Тываның Чазаа “эзирик” чоруурунга удур профилактика хемчээ кылдыр эзирик байдадыг руль артынга чораан күрүне албан-хаакчыларын ажылындан хостаарын сүмелээн хоойлужудулга эгелээшкинин идип үндүрген.

Владислав Ховалыг орук озал-ондааның муңгаранчыг сан-чурагайларын айтып тура, автомобиль мунукчузу руль артынга олуруп алгаш, бодунуң болгаш долгандыр кижилерниң амы-тыны дээш харыысалгалыг мен деп чүүлдү медереп минниринге дээштиг хемчеглер негеттинип келгенин демдеглээн.

Тыва Республикада Иштики херектер яамызының сан-чурагайларындан алырга, бо чылдың тос айларында республика девискээринге орук-транспорт болуушкуннарының саны 24 хуу көвүдээн – 306-дан 380 четкен. Ол ышкаш орук шимчээшкининден мөчээн кижилерниң саны 28 хуу өскен (60-дан 77 четкен) база а орук озал-ондактарынга берттинген кижилер саны ийи хуу көвүдээн (504-ден 514 кижи).

Аар уржуктарлыг а орук озал-ондактарының болуп турар чылдагааннары – удур шимчээшкин оруунче үне халдый бээринде, дес дараалаштыр чоруурун сагывазы, шимчээшкинниң доктааттынган дүргенин сагывазы база тодаргай орук байдалының шимчээшкининге дүүшпейн чоруурунда деп, күрүне автоинспекциязы демдеглээн.

Эрге-чагырга черлери корум-чурум камгалакчылары-биле кады орук озал-ондактар санын чавырылдырар дээш бүгү-ле хемеглерни ап турар: «полицейжи реформалар» соонда октаттынган доктаамал доскуулдарны катап ажылдадып, чурум үрээшкиннерин чурукка демдеглээр камералар санын көвүдедип, нарын орук участоктарын экижидип, эзирик машина мунарынга удур ажылдарны чорудуп, орук шимчээшкиннериниң дүрүмнерин сагыырынга база эзирик машина мунарынга удур темалыг чон чыыштарын хөй-ниитижилер база депутаттар-биле эрттирип турар. Профилактика ажылдары уруглар ортузунда база калбарган.

Корум-чурум тудар черлерниң чоруткан ажылдарының түңнелинде, эзирик чолаачыларның буруузу-биле болган орук озал-ондактарының саны 24 хуу кызырылган, 74 турганындан 56 болган. Ындыг болзажок транспорт аймаан эзирик мунарының айтырыы бөгүнде республикада эң чидиг болуп артпышаан.

Эрткен неделяда Тываның Чазаа күрүне албан-хаакчызы эзирик машина башкарып чорааш туттурар болза, ажылындан халаарын сүмелээн хоойлу эгелээшкининиң дугайында доктаалды регионалдыг парламентиже киирген.

Дээди Хурал ол доктаалды бадылааш, хоойлужудулга эгелээшкинин сайгарып көөр кылдыр Күрүне Думазынче чоруткан.