Кызылдың 30 дугаар уруглар садынга национал байырлалывыс Шагаага уткуштур өг-бүлелер аразынга "Езу-чаңчылдар – дазылывыс" деп мөөрей болуп эрткенин Национал школа хөгжүдер институт дыңнаткан. Ниитизи-биле дөрт өг-бүле идепкейлиг киришкен.
Өг-бүлелер боттарын таныштырып, национал тыва хевин көргүзүп, тыва өгге хамаарышкан тывызыктарны тып, салым-чаяанын келген аалчыларга бараалгадып, авалары боттарының кылганы тыва национал чемин тайылбырлап, ачалары аът шалбалап мөөрейлешкеннер.
Аът шалбадаарынга чедиги бөлүктүң ачазы Артыш Ооржак беш катап киир октаар турда, дөрттү шалбадап алган. Киришкен өг-бүлелер шупту талазы-биле салым-чаяанын бадыткааннар. Ук мөөрейни Национал школа хөгжүдер институттуң этнопедагогика лабораториязының эргелекчизи Алевтина Шаалы үнелеп көрген.
Дээди шаңналга чедиги бөлүктүң Ооржак Артыш Демир-Маадырович, Айлаң Семеновна база уруу Солаңгы төлептиг болган.
Бирги черде дөрткү бөлүктүң өг-бүлези Куулар Чаян Орланович, Айдасай Чүргүй-ооловна база уруу Айжыгаш.
Ийиги черде бирги бөлүктүң өг-бүлези Содуна Кежик Сергеевич, Аянмаа Николаевна база уруу Алантос.
Үшкү черде алдыгы бөлүктүң өг-бүлези Кара-Сал Саяна Валерьевна, өөнүң ээзиниң дуңмазы Чойган база уруу Гульмира.
