Бо хүннерде Шагаан-Арыг хоорайда 1 дугаар ортумак ниити билиг школазында улуг септелге ажылдары кидин түлүк. «Көдээ девискээрлерниң комплекстиг хөгжүлдези» федералдыг программаны күүседип, хоорайның улуг өөредилге черлериниң бирээзиниң оран-савазын чаартып турар.
Тываның Баштыңы Владислав Ховалыг республиканың кожууннарында инфратургузуг айтырыгларын дарый шиитпирлээринге, социал объектилерни тударынга болгаш септээринге программа улуг деткимчени берип турар деп демдеглээн.
Школага септелге ажылдары өөредилге чорудуунга кандыг-даа салдар чокка апрель 1-де эгелээн: өөреникчилерни хоорайның өске-даа өөредилге организацияларынче түр када көжүрген. Тудугжулар школаның серизин, шалазын, соңгаларын болгаш эжиктерин бүрүнү-биле чаартыр, ол ышкаш эргижирээн чылыдылга, суг хандырылга болгаш суг дамчыдар системаларны солуур дээш, ажылдары-ла хөй. Оон аңгыда, школаның шөлдерин ажыктыг ажыглаар дээш, эде чаартылгаларны чорудар.
Чаарттынган школага чаа эт-септи болгаш өөредилге дериг-херекселдерин садары, ол ышкаш спортчу шөлдү тудуп, долгандыр шөлдү чаагайжыдары көрдүнген. Бо хүнде тудугнуң чамдык эрги тудугларын бузуп, даштын чаартып эгелээн.
Федералдыг бюджеттен 192,1 сая рубльди Шагаан-Арыг школазының чаартылгазынче тускйалаан. 2025 чылдың төнчүзүнде ажылдар доостур ужурлуг.
2025 чылда «Көдээ черлерниң комплекстиг хөгжүлдези» программа күүселдези-биле Тывага 22 төлевилелди шупту 693087,64 муң рубльге боттандырар.
Тываның Баштыңы көдээ чурттакчыларның амыдырал-чуртталгазын эде чаартыр болгаш экижидеринче угланган федералдыг программага муниципалдыг эрге-чагырганың идепкейлиг киржилгези чугула базым-дыр деп демдеглээн.
