Федералдыг төлевилел-биле 490 тускай мергежилдигни өөредип белеткээр

Тывада ортумак профессионал өөредилге албан черлеринде хүлээп алыышкын кампаниязы эгелеп, үш муң ажыг оолдар, уругларны хүлээп алырынга белен. "Профессионалитет" федералдыг төлевилел программазы-биле 490 кижи мергежилдерге өөренип алыр аргалыг.

РФ-тиң Чырыдыышкын яамызының экономиканың боттуг секторунуң чугула хереглелдери езугаар тускай профессионал өөредилге системазынга мергежилдиг кадрлар белеткээр көңгүс чаа адыр моделин тургузарынче угланган, "Профессионалитет" төлевилел-биле өөредилгези сентябрь 1-де эгелээр. Россияның 68 регионунуң санында Тыва эрткен чылын киргенин сагындыраал.

Төлевилел өөренип тургаш-ла адырынга ажылдаарынга белен профессионал кадрларны белеткеп алырынга сонуургалдыг ажыл берикчизи аңаа киржип, өөредилге-бүдүрүлге кластерин ажыдар.

– Бистиң экономикавысты хөгжүдериниң мурнады боттандырар угланыышкыны – мергежилдиг ажылчын кадрларны белээткээринде. Көдээ ажыл-агый кластериниң эң херек болгаш кедилиг угланыышкыннарынче, практиктиг өөредилгеже кичээнгейни күштелдирер бис – деп, Тываның Баштыңы Владислав Ховалыг төлевилелди республиканың ортумак профессионал өөредилге системазын сайзырадырынга шуут-ла чаа чада болурун демдеглээн.

Таңды кожууннуң Балгазын суурда Тываның агроүлетпүр техникуму республикага "Профессионалитет" программазын боттандырар баазалыг өөредилге чери болур. Федералдыг төлевилел-биле өөредилгени сес өөредилге программазынга чорудар.

"Профессионалитет" төлевилел күүселдези-биле техникумда эде чаартынган сес өөредилге бүдүрүлгелери ажылдап турар. Кат-чимис, ногаа, сүт болгаш эът продукциязы болбаазырадыр өөредилге-бүдүрүлге мастерскаяларынга, үнүш ажаар өөредилге-бүдүрүлге шөлдеринге өөредилге чорудар төптү ажылдадыр.

Хүлээп алыышкын кампаниязы ажылын август 20-де доозар. 9 база 11 класстың доозукчулары документилерин республиканың хүлээп алыышкын комиссиязынче боду азы Күрүне ачы-дузаларының порталы азы Россияның почтазы таварыштыр чагаа-биле дужаап болур.