Филология факультединче дужаап кирер күзелдиглерге

Тываның күрүне университединиң филология факультединче дужаап кирер күзелдиг абитуриентилерниң документилерин хүлээп алырын дыңнадып тур. Чаңгыс аай күрүне шылгалдазын дужааган сургуулдар июль 25-ке чедир дужаап болур.

Филология факультединиң хүндүскү салбырынга өөренир үш бөлүктү хүлээп ап турар.
«Орус дыл» болгаш «Орус литература»;
«Төрээн дыл, чогаал» болгаш «Даштыкы (англи) дыл»;
«Даштыкы (англи) дыл» болгаш «Даштыкы (немец) дыл».

Бот өөредилге салбырынче – «Төрээн дыл, чогаал» болгаш «Даштыкы (моол) дыл» деп мергежилче школа доозукчуларын болгаш тускай ортумак өөредилге черлерин доосканнарны хүлээп алыр. Бо мергежилче школаларда тускай ортумак эртемниг аныяк башкыларны университет чалап турар.

Магистратураның дараазында мергежилдеринче бот өөредилге-биле сургуулдаар күзелдиг башкыларны чалап тур.
«Гуманитарлыг өөредилгеде чурагайлыг технологиялар»;
«Хөй дылдыг байдалда даштыкы дылды өөредири»;
«Чогаал болгаш дыл эртеми».

Өөренир күзелдиг абитуриентилерниң документилерин Кызыл хоорай, Ленин кудумчузунуң 5 дугаар бажыңында хүлээп ап турар.

Школалар-биле азы Тываның өөредилге яамызы-биле тускай чагыг керээзи езугаар өөренир сорулгалыг абитуриентилер Тываның өөредилге яамызының хүлээп алыышкын комиссиязын таварыштыр дужаап кирип болур.

Республиканың хүлээп алыышкын комиссиязының адрези: Кызыл хоорай, Кечил-оол кудумчузу, 15 (Кызылдың транспорт техникуму).