Тыва Республиканың Дээди Хуралының даргазы Кан-Оол Даваа республикада Ада-чурттуң Улуг дайынының киржикчилериниң аразындан чаңгыс херээжен фронтучу Наталья Ивановна Маслованың бажыңынга чедип, “Чаңгыс демниг Россия” политиктиг партияның регион салбырының база депутаттар корпузунуң мурнундан Чаа чыл бүдүүзүнде байыр чедирген.
Он тос харлыг Наталья 1943 чылда харылзаа курстарынга чартык чыл өөренген соонда, аныяк кысты фронтуже чоруткан. Ол 1943-1945 чылдарда Украин, Белорусс фронтуларның кезектеринге харылзаачылап турган. 1945 чылда харылзаа полугунуң шериглерин Японияже чоруткан.
Наталья Ивановна келир чылын мугур 100 харлаар. Фронтучу Тывада амыдырап-чурттаанындан бээр алдан чыл ажа берген. Ол Черби сумузунуң школа-интернадынга поварлап, Хову-Аксынга уруглар садынга чаштар карактап, Кызылга садыгга он чеди чыл ишти техниктиг ажылчын болуп ажылдааш, хүндүлүг дыштанылгаже үнген. Кырган-ава үш ажы-төлдүг, чээрби ажыг уйнуктарлыг.
“Чаңгыс демниг Россия” политиктиг партияның чарлааны “Чаа чыл-биле, хоочун” деп акцияның чорудуу-биле күш-ажылдың болгаш дайынның хоочуннарынга байыр чедирери чаагай чаңчыл апарган.
