Бии-Хем кожууннуң төвү Турандан Ада-чурттуң Улуг дайынының хоочуну, Япония-биле дайынның киржикчизи, фронтучу Павел Михайлович Ящиковтуң өөнүң ишти Александра Андреевна 93 харлаанын ТР-ниң Күш-ажыл яамызы дыңнаткан.
Ящиковтарның өг-бүлези чуртталгазының хөй кезиин Тывага ажылдап, чурттап эрткен. Олар 1955 чылда Сөш суурга көжүп келген. Александра Ящикова Красноярск крайның Курагинск районунуң Тамбовка суурга тараачын өг-бүлеге төрүттүнген. Школа дооскаш «Белый Яр» совхозка ажылчын намдарын эгелээн. 1950 чылда Павел Михайлович-биле өг-бүле туткан. Фронтчунуң төрүттүнген чурту Красноярск крайның Белый Яр суур. Ада-чурттуң Улуг дайынының хоочунунуң чүрээ 2020 чылдың декабрь 9-та, 94 харлыында, сокпайн барган. Ящиковтар эгин кожа кады 70 чыл чурттаан. Беш ажы-төлдүг, хөй санныг уйнуктарлыг.
Фронтчуну Кызыл Шеригже 1943 чылдың октябрь 30-де кыйгырткан. Ыраккы Чөөн чүкке кызыгаар камгалалының дайынчы кезээнге турган. Оон Благовещенск хоорайда командирлер курсттарынче шиличиттирген, аңаа дайынчы белеткелди эрткеш, Ыраккы Чөөн чүк фронтузунуң 13-кү дивизиязының 34-кү полктуң составынга чадаг шеригниң харылзаа кезээнге Япония-биле дайынга тулчуушкуннарга киришкен.
Павел Михайлович «Хүндүлелдиң демдээ» орден, «Күш-ажылдың хоочуну», «Күш-ажылга шылгарал дээш», «Японияны тиилээни дээш» деп юбилейлиг болгаш өске-даа медальдар-биле шаңнаткан.
Тывада Ада-чурттуң Улуг дайынының хоочуннары болгаш тылдың ишчилери Тиилелгениң 80 чылынга тураскааткан федералдыг төлевирлерден аңгыда, республика бюджединден 50 муң рубльди немей алыр дугайында чарлыкка Тываның Баштыңы атты салганын сагындыраал.
ТР-ниң Күш-ажыл яамызы дыңнатканы-биле алырга, Тываның 53 чурттакчызы ол төлевирни алыр. Оларның үжү Ада-чурттуң Улуг дайынының киржикчизи, бирээзи концлагерь хоругдаттырыкчызы, 27 кижи тылдың ишчизи база 21 кижи чок болган фронтучуларның өөнүң ишти.
