Бүгү делегейниң Өг-бүле хүнүн таварыштыр эртип турар «Чылдың өг-бүлези» бүгү-российжи мөөрейниң регионалдыг чадазының «Өг-бүле – езу-чаңчылдарның кадагалакчызы» номинациязынга Айгор биле Белекмаа Көшкендейлерниң өг-бүлези үшкү черни ээлээнин ТР-ниң Өөредилге яамызы дыңнаткан.
Айгор Игорь-оглу биле Белекмаа Андреевна – Кызыл хоорайның 1 дугаар школазында аныяк башкылар. Олар уруг-дарыгны тыва чоннуң ук-төөгүден дамчып келген чаагай чаңчылдарын сагып, ону хүндүлеп база кадагалаарынга өөредип чоруурлар.
Хөй уруг-дарыглыг аныяк өг-бүле тыва улустуң хөгжүм культуразының, хөөмей-сыгыттың болгаш чаагай чаңчылдарның кадагалакчылары болуп чоруур. Аныяк башкылар өг-бүлениң чаңчылдары аас-кежиктиң болгаш чаагай амыдыралдың дөзү деп санап турарлар.
– Өг-бүле дээрге чүнүң-даа мурнунда улуг күш-ажыл база улуг харыысалга болбайн канчаар. Өг-бүлелерде ажы-төл, хөй нуруузунда, бот-боттарынче көрүп, деңнежип, үлегерин эдерер. Хүндүлээчел болурунга өөренир, улуглары бичиилери-биле кичээлдээр болгаш, чоок кижилериниң дугайында кичээнгейлиг болгаш сагыш човаашкыны-биле ылгалып турарлар.
Ада-ие болуру – нарын-берге болгаш харыысалгалыг. Ажы-төлдү кижизидери дээрге чүгле эртенден кежээге чедир “угаанныг” сургаал кылыры эвес. Кезээде болгаш каяа-даа үлегер болур ужурлуг. А ол ындыг амыр эвес! Ынчангаш ажы-төлүңерге боттарының ада-иези-биле чоргаарланыр кылдыр арганы бериңер – деп, Көшкендейлер демдеглээн.
«Өг-бүле» национал төлевилел күүселдези-биле бүгү-россия чергелиг «Чылдың өг-бүлези-2025» мөөрейни эрттирип турар. Ооң кол сорулгазы – өг-бүлениң чаңчылчаан үнелиг чүүлдерин быжыглаары болгаш нептередири, ол ышкаш чедиишкинниг өг-бүлелерниң үлегерлиг арга-дуржулгазын нептередири. Бо чылын мөөрейге бүгү республикадан 70 өг-бүле киришкен.
