Чеди-Хөл кожууннуң Элегест суурга «Өг-бүле – ниитилелдиң кол өзээ» деп республика чергелиг семинарның иштинде «Ада кижиниң ниитилелде овур-хевири» деп төгерик ширээниң киржикчилери ада кижи кандыг болурул, ажы-төлге чүнү дамчыдып бээрил деп айтырыгларны сайгаржып чугаалашканын Тыва үндезин культура төвү дыңнаткан.
Чеди-Хөл кожууннуң уруглар садының болгаш школаларының кижизидикчи башкылары, Элегест суурнуң хүндүлүг чурттакчылары база Тыва үндезин культура төвүнүң ажылдакчылары киришкеннер. Төгерик столдуң кол дыңнакчылары Элегест ортумак школазының 9, 10, 11 класстың оол өөреникчилери.
Семинарның эрттирикчилери «Теремок» уруглар садының башкылары, директору – Олимпиада Ондар, Россия Федерациязының Улус Өөредилгезиниң тергиини.
Төгерик ширээниң илеткекчилери ниитилелде мөзү-бүдүштүг эр болуп тургустунарынга, ада кижиниң кижизидикчи ролюн тодаргайлыы-биле чугаалааннар. Станислав Болгум-оол, РФ-тиң Улус Өөредилегизиниң тергиини, бодунуң эрткен оруун чугаалап тургаш, школа назылыг кайгал, тенек оолдарны туризм бөлгүмүнүң ачызында – төрээн чер чурттун кезип, ооң ыдыктыг тейлеринге барып чорааш, оолдарның чаңын чавылдырып, чазыктырып болурун чугаалаан.
Хостуг байдалда одагга башкы биле өөреникчи ажыт-чажыт чокка чугаалажып, сагыш-сеткилин үлежир. База эр кижи бодунуң төрээн дазылын өөренип чорууру, төргүл-төрел улус үнчүп-киржип чорууру чугула дээрзин чугаалаан. Өөреникчилерге тыва номнарны идекпейлии-биле номчуп, ында бижип каан төөгүлерни номчуп ора, кино ышкаш бажынга чуруп турар боорун чагып сургаан.
Станислав Алексеевичтиң өөреникчизи Алдын-Херел Нордуп-оол башкызының изин истеп, бо үеде Элегест ортумак школазында ажылдап турар үлегерлиг аныяк башкы. Ол бодунуң эртем-билиинге дүүштүр өөреникчилеринге чер чурттунга камныг, хумагалыг болурун өөредип турбушаан, школачыларны туризм бөлгүмүнче сундуктуруп, сонуургадып чоруур.
Тыва үндезин культура төвүнүң өөрдилге-методиктиг килдистиң хөөмей болгаш хөгжүм башкылары Э. Ш. Ховалыг, М-Х. Р. Чадамба боттарының дуржулгазы-биле үлешкеннер.
Эрес Шолбанович бичии тургаш-ла хөөмей-сыгытты дыңнап өзүп келгенин, ачазының өпей хөөмейинге алаактырып турганын сагынган. Бичии кижи ачазын өттүнүп хөөмейлеп, ону кым-бир кижи көрүптер ыйнаан деп ыядып, чажыртынып ачазының хөгжүм херекселдеринге ойнап, хөөмейлеп турганын чугаалаан. Ынчалдыр-ла хөөмей, сыгыт – тыва кижиниң кужуру, ооң чурталгазының депшии, чалгыны болганын өөреникчилерге хөөреп берген.
Мерген-Херел Робертович хөгжүмден аңгыда «эр кижинин чыргалы – тайга бажында» дээр болгай дээш, чажындан тура улуг улузун эдерип, тайга-таңды кезип, саң салып, тайга кежиин дилеп, чалбарып өөренип чорааны-биле үлешкен.
Элегест сумузунуң чагырга даргазының оралакчы даргазы Айдыс Геннадьевич өөредилгениң кол ролюн, эртемни чедип аары амыдыралга ажыктыын чугаалавышаан, база семинарга бир дугаар киржип турарын, ооң онза-солунун демдеглээн.
Суурнуң хүндүлүг чурттакчызы, өгбези Алдын-оол Даңмаевич амыдыралга ажыл кижини каастаар, ажылчын кежээ болуру амыдыралдың кол өзээ дээрзин оолдарга сагындырып чагаан.
Семинарның база бир дыңңнакчылары, киржикчилери кижизидикчи башкылар. Олар бо үлешкен дуржулгаларны, методиканы ада-ие-биле ажылдаарынга киирип болурун сонуургап дыңнааннар.
Өг-бүле чылынга тураскааттынган семинарның ажыктыын, ооң келир үеде өзүп орар чаштарга салдарлыг боорун киржикчи бүрүзү демдеглээн.
Ук семинар 2017 чылда «Теремок» уруглар садының база Тыва үндезин култьтура төвүнүң удур-дедир ажылдажылгазының керээзин чарганының түңнелиниң уламчы ажылы болуп турар.
Тыва үндезин культура төвү уруглар садының башкыларынга четтиргенивисти илереткен.
