Улуг-Хем кожууннуң Торгалыг, Чааты сумузунда арат-тараачын ажыл-агыйлыг Мөңгүн-оол Данзы-Белек, Ахмед Дадар-оол база хууда ажыл-агыйлыг Аян Дамдынай машина-техниказын мөөңнээш, Шагаан-Арыг хоорайның төп суг арыглаар чериниң чанында шөлдү чардырып, картофельди тарып олуртканын чагырга чери дыңнаткан.
Тываның Баштыңы Владислав Ховалыгның идип үндүргени "Өг-бүле шыгжамыры" төлевилелдиң күүселдезин чорудуп тура, арат ажыл-агыйжылар картофельди Шагаан-Арыг хоорайның тускай шериг операциязының киржикчилеринге (өг-бүлелеринге) болгаш орулгазы эвээш өг-бүлелерге халаска олуртуп бээр деп шиитпирлээннер.
Кожуун чагыргазы кывар-чаар чүүл-биле хандырылган. Алды тонна картофель үрезинин хууда арат Аян Дамдынай Тываның көдээ ажыл-агый яамызының "Өг-бүле шыгжамыры" деп программазы-биле эккелген.
Ниитизи-биле ийи гектер черде тарыттынган картофель шөлүнүң суггарылга айтырыын Шагаан-Арыг хоорай чагыргазы харыылаар болган. Дазыл-чемиш шөлүн долгандыр кажаалап албас болза мал-маган базып кааптар. Ынчангаш ук шөлдү долгандыр кажаалаар ыяшты хоорайда пилорамалыг хуу сайгарлыкчылар-биле дугуржуп, херимни демнежип тургаш кылырын дугурушкан.
