Бии-Хем кожуундан «Өг-бүлениң шыгжамыры» төлевилелдиң киржикчилериниң бирээзи – Аржаан сумузундан Андрей Суханов. Ол хууда дузалал ажыл-агыйлыг.
Аржаан суму чагыргазының даргазы Екатерина Тулуш төлевилелдиң киржикчизи фельдшер-акушер пунктузунда таңныылдап ажылдап турарын дыңнаткан.
– Андрей Суханов «Өг-бүлениң шыгжамыры» төлевилелге киржир дээш ТР-ниң Көдээ ажыл-агый яамызынче чогуур документилерни кииргеш, 150 муң рубль түңнүг субсидияны алган. Ол «Хакагроторг» кызыгаарлаан харыысалгалыг ниитилел-биле керээни чаргаш, «Ривьера» сорттуң алды тонна картофель үрезинин саткаш, эккелген. Картофельди май 25-те тарып олуртур.
Көдээ ишчивис алыс боду эрес-кежээ, чер ажылынга сонуургалдыг, дузааргак кижи. Өөнүң ишти Чаяна Ооржак сумунуң дуржулгалыг ногаажыларның бирээзи. Ол огородундан ажаап алган ногаазының дүжүдүн, оран-таңдызындан чыып алган мөөгүзүн болгаш кадын чедер кылдыр болбаазырадып алыр чаңчылдыг. Өг-бүле ийи ажы-төлдүг – деп, чагырга даргазы төлевилелдиң киржикчизин таныштырган.
Амгы үеде «Өг-бүлениң шыгжамыры» төлевилелдиң киржикчизи хууда машина-техниказы-биле картофель тарыыр шөлдү чардырып турар. Ол “ийиги хлебти” үш гектер черге тарып олуртур сорулгалыг. Кожуун чагыргазы кывар-чаар чүүл-биле хандырылган.
