Улуг-Хем кожуундан «Өг-бүлениң шыгжамыры» төлевилелдиң киржикчизи – Эйлиг-Хем сумузунуң уруглар садының паштанчызы, “Эне-Сай” агитбажыңның идепкейжизи Василиса Монуш-оол.
Василиса Васильевна бажыңының хериминиң иштинде ногаа тарыыр огороду эвээш черни эжээлеп турар-даа болза, холу элбек болгаш элбек дүжүттү ажаап алырын сумунуң херээженнер чөвүлелиниң даргазы Рада Быштак-оол дыңнаткан. Ол огородун шын чемишчидип, суггарып турар.
Картофелин база чылдың-на херим иштинде черин болбаазырадып тургаш, 20-ден 40 шоодай дүжүттү алыр.
Ногаажы өөнүң ээзи-биле сумуда үлегерлиг, ажыл-ишчи, хөй-ниитижи өг-бүле. Үш кыстарының ийизи ийистер, амгы үеде эмчи чериниң сургуулдары. Хеймери 7-ги класста өөренип турар.
Эрткен чылгы ногаазының дүжүдү болгаш тайгадан каттааш вареньелеп алган курлавырын подвалынга шыгжааш, кыштадыр уштуп чип, чеминге ажыглап келирге, үүжези ам-даа артып калган. Өгнүң херээжен ээзи артыкшылдыг дүжүдүн чону-биле үлежип, чогумчалыг өртекке саткан.
