Улуг-Хем кожуундан Алдын-Херел Дамыймаа 2023 чылда шериг керээзин чарып алгаш, тускай шериг операциязынче чорупкан. Ооң турган шериг кезээ Артемовск (Бахмут) талазынга тулчуушкуннарга киришкен. Аңаа тускай шериг операциязының хоочуну дайынчы хүлээлгезин эки күүсеткеш, төрээн Тывазынче чанып келгенин чагырга чери дыңнаткан.
Тускай шериг операциязының хоочуну школа дооскан соонда Иркутск хоорайда бизнес болгаш эрге-хоойлу колледжинге өөренип кирип алгаш, чер, өнчү-хөреңги талазы-биле салбырын доозуп алган. Шериг албан-хүлээлгезин Алтай крайга эрткеш, Кызылдың тудуг техникумунга тудугжу, улаштыр төрээн хоорайы Шагаан-Арыгга каңнакчы, автомеханик мергежилдерни чедип алган. Ол тудуг организацияларынга-даа, хууда кижилерниң тудуунга-даа ажылдааш, арга-дуржулгазы бедээн.
Алдын-Херел Дамыймаа черле боду шевер, ажылгыр болгаш дайынчы хөделиишкиннер девискээринден келгеш, социал керээге үндезилээн күрүне деткимчези-биле тудуг болгаш өске-даа ажыл-агый кылыр дериг-херекселди садып алган. Ол амгы үеде Шагаан-Арыг хоорайда бодунуң эртеминиң аайы-биле ажыл-херээн ажыдып алган.
Эгелеп чоруур сайгарлыкчы чондан кирген чагыгларны хүлээп ап, хуусаазында кылып турар. Ол бажың тудуундан эгелээш, иштики сантехниктиг ажылдар, эжиктер, соңгалар эптеп салыры, эт-септи эптеп чыыры дээш оон-даа өске ажылдарны кылырынга белен.
Дайынчы хөделиишкиннер хоочуну боду биче сеткилдиг, дузааргак болгаш тускай шериг операциязының киржикчилериниң өг-бүлелеринге чиигелделиг, чамдыкта халас-даа ачы-дузаны чедирип турар. Чоокта чаа кадыкшылының байдалы-биле кылаштап шыдавас, коляскада олурар кижиге бажың иштиниң эжиктерин халаска салып, ачы-буянын чедирген.
Алдын-Херел Дамыймаа хөй ажы-төлдүг ада. Ийизи школачы, ийи бичиизи уруглар садынче барып турар.
