Тыва үндезин культура төвүнүң директору Игорь Көшкендей апрель 22-27 хүннеринде Тываның Баштыңы Владислав Ховалыгның удуртулгазы-биле Луганск болгаш Донецк улус республикаларже ажыл-агыйжы сургакчылаашкынының дугайында соцчеткилерде бижээн.
– Тывавыстың Баштыңы Владислав Товарищтайовичиниң удуртулгазы-биле улуг күрүневистиң чаа регионнарынче үнүүшкүннерге кириштивис. Тывавыстың эрес эрлеринге барып, амыр-мендивисти солчуп, бурун өгбелеривистиң уран чүүлүнүң хензиг кезии хөөмей-сыгыдывыс, ыры-шоорувусту сагыш-сеткиливистен үлежип четтивис.
Тыва дайынчы оолдарывыстың чугаа-соодундан, арын-шырайындан ада-өгбелеривистен дамчып келген тура сорукту, быжыг турушту эскерип, магададывыс. Оларның аразында тыва кижини хөй чылдар ишти көрбээн оолдар база бар болду. Өөрүп, амырап турарын көргеш, сагыш-сеткил көдүрлүп, хөрек-ишти өйүп келир-дир.
Өгбелерниң өндүр ыры-хөөмейи-биле дайынчыларның хей-аъдын киискидип, сүлдезин бедидип, арамайлап салып бердивис.
Кезек үелер ишти Тывавыстың чараш бойдузунуң кавайынга өпейледип орган ышкаш апаар кылдыр сактыышкыннар хөөрежип, тыва чонувустуң келир үезиниң күзүңгүзүн безин бакылап көрдүвүс. Түрлүг-сүрлүг эрлерге амыр-чаагай, онча-менди чанып келирин күзедивис.
