Өвүр кожууннуң Хандагайты сумузунга Тываның Улустуң хөөмейжизи Геннадий Туматтың чырык адынга база Наадым байырлалынга тураскааткан республика чергелиг хөөмейжилер аразынга «Сыгыт-хөөмей Өвүр черде» деп мөөрей болуп эрткенин Тыва үндезин культура төвү дыңнаткан.
Дээди шаңналга Мундукай Лопсан төлептиг болган. Хөөмейжиниң шаңналы – аскыр өөр чылгы. Мөөрейниң тиилекчилеринге акша шаңналдарын тывыскан. Тываның улустуң хөөмейжилери Кайгал-оол Ховалыгның, Игорь Кошкендейниң, Андрей Монгуштуң, Радик Тюлюштүң, Тываның алдарлыг артизи Мерген Кууларның тускай шаңналдарынга төлептиг болган хөөмейжилерни шаңнап-мактаан. Геннадий Туматтың дөргүл-төрелинден тускай шаңналды база тывыскан.
Төөгүлүг «Тыва» ансамблин үндезилеп тургусканнарның бирээзи Геннадий Хайдыпович аравыска чораан болза, бо чылын 60 харлаан оюн демдеглээр турган. Улустуң хөөмейжизи «аът киштедири» деп арганы эң бедик деңнелге күүседип, хөөмейниң аңгы-аңгы хевирлерин арыг салып, сыгыт, хөөмей, каргырааның «борбаңнадыр», «эзеңгилээр» деп аргаларының көскү нептередикчизи чораан.
Ховар салым-чаяанныг хөөмейжи «Тыва» бөлүүнүң уран чүүл удуртукчузу болуп ажылдап турган үелеринде, хөөмей-сыгытка сундулуг, салым-чаяанныг кижилерни дилеп тыпкаш, оларны ажыл-ишке хаара тудуп, өгбелеривистен дамчып келген кайгамчык эртиневис хөөмей-сыгытка өөредип, улус-чонунга бараан болуп келген.
Чарлаттынган мөөрейниң кол негелдези езугаар «Тываның улустуң хѳѳмейжизи», «Тываның алдарлыг артизи», «Россияның алдарлыг артизи» чергелиг хүндүлүг аттарның эдилекчилери киржип болбас турган.
