Август 15-16 хүннеринде, «Хүн-Хүртү» фолк-бөлүүнүң 30 чылынга тураскааткан «Азия төвүнде хөөмей» деп V делегейниң фестивалы эгелээр.
«Азия төвүнде хөөмей» делегей чергелиг мөөрей-фестиваль 2015 чылда бир дугаар эрткенин сагындыраал. Ынчан Россия, АКШ, Испания, Италия, Финляндия, Япония, Кыдат болгаш Моолдан шупту 196 хөөмейжи келген.
Тыва культура төвүнүң дыңнатканы-биле алырга, бо хонуктарда ырак-чооктан хөгжүмчүлер кээп эгелээн. Тываның ады-сураа билдингир болгаш аныяк коллективтеринден аңгыда, Хакасия, Алтай, Калмыкия, Москва, Моол, Кыдаттан төлээлер келир.
– 50 хөгжүмчү болгаш 13 ансамбль боттарының көргүзүүн бараалгадырын бадыткаан. Киржирин дыңнаткан чагыглар ам-даа кээп турар, оларны бүрүткел эгелээринге чедир хүлээп алырынга белен бис. Эрткен чылдарда дээди шаңналдарның каш дакпыр эдилекчизи, Россия Федерациязының алдарлыг артизи, Тыва Республиканың Улустуң хөөмейжизи Мөңгүн-оол Ондар баштаан жюри кежигүннери хөөмейжилерни үнелээр – деп, Тыва культура төвүнүң директорунуң оралакчызы Менги Ондар тайылбырлаан.
«Гремми» шаңналының кордакчызы, Лос-Анджелестен продюсер база артист Кармен Риццо, Российжи аас-чогаал эвилелиниң баштаар чериниң даргазы Сергей Старостин тыва черге бир дугаар келир.
Алдын-Булак этнокультурлуг комплексте «Хөөмейжиниң оваазын» ыдыктаарындан фестиваль эгелээр, оон дараазында ийи хүнде Тыва культура төвүнге мөөрейлер болуп эртер. Хөөмей фестивалының ажыдыышкыны 20.00 шакта Азия төвүнге болур болза, Арат шөлүнге түңнел-концерт-биле фестиваль доостур.
