Бии-Хем кожууннуң бичии болгаш элээди оолдар аразынга ай санында чанчыл болган эртип турар хүреш маргылдаазын бо удаада хүтчүлер эрттирген.
Найырал арбанында «Эзирлер уязы» төлевилел-биле туттунган спорт залынга эрткен маргылдаага 60 мөге ачыр-дачыр тудушкан. Олар назы-хар аайы-биле беш аңгы бөлүкке хүрешкен. Мөгелерни ада-иелер, тренер башкылар база тыва хүрештиң аарыкчылары деткип келген.
Хүт суму чагыргазы спорту сайзырадып, тыва хүрешке сонуургалдыг оолдарны деткип, маргылдааны бедик деңнелге эрттирген.
«Ойна» алдын тывыш артелиниң удуртулгазы деткикчилеп, мөгелерни шаңнап-мактаан.
Дараазында хүреш маргылдаазы Туран хоорайга болуп эртер. Февраль айда хоорай чагыргазының шаңналы дээш кожуун чергелиг хүреш маргылдаазынга мөгелер күжүн шенежир.
