Улуг-Хем кожууннуң Хайыракан суурунда назылап-кыраан болгаш шимчеп албас хамаатыларга дазылга бажыңында кышкы одалга сезонунга белеткел ажылдары кидин түлүк чоруп турар. Бо хүнде “Өлчей” кызыгаарлаттынган харыысалгалыг ниитилел суг чылыдар ийи котелду солууру база тургузары-биле эккелген.
Хайыраканның дазылга бажыңынга немей ийи чаа корпусту тудуп турарын сагындыраал. Ниитизи-биле сезен оруннуг ийи чуртталга оран-савазының тудуун август айда ажыглалче киирери-биле коъш кол белеткел ажылдары база уламчылавышаан. Тываның Күш-ажыл болгаш социал политика яамызының дыңнадып турары-биле алырга, июльдуң эгезинде корпустарның техниктиг белени 98 хуу четкен.
Ук объектилерни «Демография» национал төлевилелдиң «Улуг салгал» төлевилелиниң федералдыг бюджеттен кады акшаландырыышкыны-биле тудуп турар.
Тудугнуң чагыкчызы – Тываның Күш-ажыл болгаш социал политика яамызы, чаа оран-сава амгы үениң санитарлыг болгаш өртке удур бүгү негелделеринге дүгжүп турарын дыңнаткан.
Оон аңгыда кадыкшылы кызыгаарлыг хамаатыларның аай-дедир шимчээринге шаптараазын чок хүрээлелди тургузар. Албан чери неделя санында тудугнуң чорудуун хынап турар.
