Халыын изиг хүннер өрт айыылын тургузуп болур

Республикада арга-арыг өрттеринден онза байдал чурумун киирген. Тываның Баштыңы Владислав Ховалыг тускай угланыышкыннарлыг яамылар удуртукчулары база кожуун чагырга даргалары-биле кады оперативтиг байдалды сайгарып көргениниң соонда, ындыг шиитпирни хүлээп алган.

Июньнуң бирги чартыында республика девискээринге изиг халыын тургустунганын сагындыраал. Республиканың эрге-чагыргазы арга-арыгже кирерин кызыгаарлаан “өртке удур онза чурумну” чарлаан соонда, кижиниң хайындан өрттер саны кызырылган. Ындыг болзажок изиг хүннерде кургаг чаңныктар дүшкенинден база күштүг хаттардан арга-арыг өрттери бо-ла үнүп турар.

Хамааты камгалал болгаш онза байдалдар херектериниң талазы-биле албаны бо хүнде 1700 хире гектар черде 23 арга-арыг өрттери хып турарын дыңнаткан. Өрт-биле демисел уламчылавышаан, ынчалза-даа хая-даштыг, чедери берге черлер моондактап турар.

– 220 хире кижи өрт айыылы-биле тутчуп турар. Забайкалье крайда өрттер өжүржүп турар бистиң 30 хире авиадесантниктеривис удавас маңаа катчып келир. Оон аңгыда, Сибирьниң чамдык регионнар удуртукчуларындан боттарының өртчү командаларын Тываже чорудуп бээр дилегни киирген мен – деп, Владислав Ховалыг бодунуң шиитпирин тайылбырлаан.

Тываның Көдээ ажыл-агый яамызы Хакасия, Омск база Новосибирск областардан өртчү командаларны сургакчыладыр дугайында дилегни Росарга-арыг ажыл-агыйынче чоруткан. Федералдыг албан чериниң чөпшээрели-биле Тываже немелде күш келир. Кожа регионнардан 40 хире дайынчының кээрин база манап турар. Өрт өжүреринге «Туваавиа» бүдүрүлгезиниң суг чаштырар херекселдиг “Ми-8” вертоледу дүүн катчып келген.

Ол ышкаш регион удуртулгазы-биле дугуржулга езугаар Тываның улуг үлетпүр бүдүрүлгелери – «Голевтиң даг-руда компаниязы», «Ойна» алдын тывыш артели, «Лунсин» компания бүдүрүлгелериниң чоок кавызында өрттерни өжүреринге дузалажыр.

Агаар медээзинден алырга, июль 1-ниң хүнүнде республиканың чамдык черлеринге кызаңнаар, хаттың дүргени секундада 15-20 метр чедер, долу дүжери магатчок, республикага ниитизи-биле изиир, агаарның температуразы +35 грудас ажар чадавас.

Кызыл кожууннуң девискээринге 5-ки класстың, а Таңды, Улуг-Хем, Эрзин, Каа-Хем, Бии-Хем, Чөөн-Хемчик база Мөңгүн-Тайга кожууннар девискээрлеринге 4 класстың онза өрт айыылы хевээр артар.