Бии-Хем кожууннуң «Энерелдиг сеткилдиң оруу» ачы-дуза фондузунуң эки турачылары тускай шериг операциязында киржип турар камгалакчы оолдарга хой дүгүнден чылыг уктарны аргып турар.
Билелиг арбанының херээженнер чөвүлелиниң идепкейжилери дүктү дыдып, ээрген. Эки турачылар ээрип каан дүкче херек хендирни немээш, чылыг уктарны аргааннар.
Ачы-дуза фондузунуң директору Наталья Ондар Билелигниң херээженнер чөвүлелинге четтиргенин илередип, бии-хемчилерни «Солдатка чылыг уктар» акцияга катчырынче кыйгырган. Ук чөвүлелдиң идепкейжи кежигүннериниң бирээзи – Алдынай Бегзи-Хуурак аът челинден уктарны аргаан. Аът челинден аргаан уктар чылыг-даа, шык-даа тыртпас, сугга-даа өтпес.
Кижи бүрүзү тиилелгени чоокшулаштырар дээш үлүг-хуузун киирип болур, ынчангаш күзелдиг улус шыдаар шаа-биле ачы-дузазын көргүзер аргалыг.
Камгалакчы оолдарывыска чылыг идик-хепти тускай шериг операциязында киржип турар дайынчыларга ачы-дуза чыыр пунктуже дамчыткан.
Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Кызыл партизан кудумчузунда 30 дугаар бажың, каб. 106.; Кызыл хоорай, Кочетов кудумчузунда 30 дугаар бажың, каб. 26.
