Хереглекчилерни шынар чок барааннардан камгалаар демдек системазын ажылдадыр

Тываның Баштыңы Владислав Ховалыг барааннарга «Шынчы демдек» демдек системазының ажыглалын хынаар штабты тургускан. Демдек системазын ажылдадыры Тываның Чазааның ажыл-чорудулгазының аңгы адыры апаар.

Владислав Ховалыгның дужаалы-биле ол ажылды углап-баштаар албан черлер аразының штабын тургускан, ону чазак даргазының оралакчыларының бирээзи удуртур.

Штабтың сорулгазы – бүдүрүкчүден садыгжыже бараан бүрүзүнүң шимчээшкинин хынаары болгаш өттүндүр кылган база шынар чок продукциядан хереглекчилерни камгалаар сорулгалыг бүгү-российжи демдек системазынче киржир кылдыр тус черниң сайгарлыкчыларын болгаш бараан бүдүрүкчүлерин хаара тударын хандырары.

Тывада «Шынчы демдек» кежигүнү кылдыр бүрүткеттинген 480 садыг-саарылга черлериниң аразындан чүгле 220-зи боттарының кассазын системаже кожуп, садып алыышкын бүрүзүнүң медээзин ажыткан. Бо арганы ажыглап тургаш, чүгле үндүрүг органнары эвес, а садып алыкчы бараанның бүгү төөгүзүн хайгаарап болур – ону кым болгаш кажан бүдүрген, кайыын болгаш кымдан келген дээш оон-даа өске.

Тургустунган штабтың сорулгазы – тыва сайгарлыкчыларны «Шынчы демдек» системаже бүрүткедирин дүргедедири, ол ышкаш аңаа долу киржилгеге херек дериг-херекселдер болгаш программа продукциязы-биле садыг-саарылга черлерин чепсеглээри болур. Оон аңгыда республиканың чазаа ол чарыгдалдарны оларга эгидип бээринге белен болгаш 75 хуузун эгидип турар.

Продукцияны демдек системазынче шапкын киирери сайгарлыкчыларның боттарының, ылаңгыя шынчы ажылдаарын оралдажып турар кижилерниң сонуургалында деп, Тываның Баштыңы санап турар. Продукцияның бедик шынарын хынаар болгаш бадыткаар арга кылдыр бо системаны киирерин Россияның Президентизи саналдаан, ынчангаш төлевилелди бодунуң ужур-чурумнуг түңнелинге чедирер. Ол дээрге өттүндүр кылдынган барааннардан рынокту хостаары болгаш ук барааннарны шынчы эвес тарадып турар улусту харыысалгага онаары-дыр.