Ховар таваржыр аарыгларлыг уругларга ачы-буян

Россияның Президентизи Владимир Путинниң Чарлыы-биле 2021 чылдың эгезинде “Ачы-буянның дээрбээ” фонду тургустунган. Бо фондунуң кол сорулгазы – амы-тынга айыылдыг болгаш хоочураан аар, ховар таваржыр аарыгларлыг уругларга дуза болгаш оларны камгалаары.

Республиканың Чазаа “Ачы-буянның дээрбээ” фонд-биле кады ажылдажылга дугуржулгазының төлевилелин чүүлдүг деп көрген. Тываның Баштыңы Владислав Ховалыг фондунуң удуртулгазы-биле дугуржулгага атты салырын белеткээр даалганы ТР-ниң Кадык камгалал яамызынга бергенин айыткан доктаалга атты салган.

“Ачы-буянның дээрбээ” фондунуң тургустунганындан бээр албан чери кады сырый ажылдап турарын Тываның кадык камгалал сайыды Анатолий Югай дыңнаткан. Фонд ховар таваржыр аарыгларлыг уругларга аар өртектиг эмнерни база техниктиг кылыгларны эккээринге дузаны көргүзүп турар. Тывада ховар дээн карак аарыглыг Святослав Федоровка 20 сая рубль ажыг өртектиг эмни садарынга фонд дузазын көргүскен.

Амгы үеде фонд ховар аарыгларлыг 10 уругга чогуур ачы-дуза чедирилгезинде киржип турар. 2021 чылдан 2023 чылга чедир ховар таваржыр аарыгларны эмнээр дээш 357 сая рубльге эмнерни база медицина кылыгларын тускай чагыглар езугаар фонд таварыштыр Тываже чоруткан.

“Ачы-буянның дээрбээ” фонд-биле кады ажылдажылганы оон-даа бедик деңнелче шилчиткени, дүрген болгаш дээштиг кады ажылдажылгага бөгүн шаптыктап турган чамдык чүүлдерни эде тургузуптарынга Анатолий Югай бүзүреп турар.

Чагыгларны сайгарып көөрүнүң хуусаазы кызырлып, республика биле фондунуң аразында информация солчулгазын экижидеринге яамыда ынанып турар. Ооң түңнелинде, чагыглар күүселдези үш-дөрт ай чеде бээринден, бир ай чедир кызырлыр ужурлуг.

Фондунуң акша-хөреңгизи чылда беш сая рубльден хөй орулганы ажылдап ап турар хууда хамаатыларның күрүнге киирген үндүрүгнүң акшазындан тургустунуп турар. Чижек санаашкыннар-биле алырга, ол үндүрүгнүң түңү бир чылда 60 миллиард рубль болур.