Найысылал Москва Чаа чылга белеткенип, шиник кирген. Төптүң культура амыдыралынга делгелге-биле чергелештир чогаал дээжизи «Россия чоннарының тоолу» деп 93 авторларның чогаалы кирген чыындының үнгенинге тураскааткан Архитекторлар бажынынга болган байырлал сонуургалды хаара туткан.
Эге сөсте «ном улусту солун овурлары-биле кайгадыр, улуг чуртувустуң культуразы кайы хире хөй талалыг, онзагай дээрзин билип алыр». Тываның Улустун чогаалчызы Артык Ховалыгның «Чеди чажыт ээзи Чанчып деп оол дугайында тоолу» «Улусчу ужурлар, тоолчургу чугаалар» деп эгеде кирген. Национал чогаалды Тыва бо номда чааскаан төлээлээн.
Тываның чогаалчылар эвилелиниң Москвада салбырының даргазы, идепкейжи дагдыныкчы Борис Балчий-оол ол байырлалда «Эртенгиниң эртенинде…» деп тоолдаар дээрге, сөс алыр улус хөй болганындан болдунмаан. Тоол ангы ном кылдыр үнүп кээрге, ол ону ыдып бээрин дыңнаткан.
Автор номун К. И. Чуковский аттыг уруг¬ларның ном санынга, Бора-Тайганың ном санынга, Тываның Чогаалчылар эвилелинге белекке чогаалчы Сайлыкмаа Комбу дамчыштыр чоруткан.
Тыва чогаалчылар делгелгени сонуургап көрген. Ном таныштырылгазында өске девискээрлерден келген чогаалчылар-биле таныжып чугаалашкан.
