К.Б. Ондар аттыг Тыва үндезин культура төвүнүң директору Игорь Кошкендей чаңгыс чер чурттугларын камнажып, карактажып, деткижип чоруурунче кыйгырган.
– Чырык өртемчейге төрээн чонумнуң муң-муң чылдар иштинде дамчыдып келген аас чогаалының хензиг-ле бир кезиин эдилээр салымныг болдум.
Делегейниң аңгы-аңгы чурттарының чоннарынга тыва ыры-хөгжүмнү, хөөмей-сыгытты бараалгадып, оларның салган айтырыгларынга харыылап, Тывавыстың каас-байлак бойдузун тайылбырлап, чонувустуң төөгүзүн, дылын, культуразын билир шаавыс-биле таныштырып чоруур бис.
Кажан өске черниң чурттакчы чоннарынга тыва чонувустуң бурун төөгүзүн, культуразын, өгбелеривистиң амыдырал-чуртталгазынче көрүжүн о.ө тайылбырлап тургаш, тыва чонувустуң күштүг тура-соруун, хуулгаазын салым-чаяанын база катап миннип, чоргаарал оттуп келирин демдеглээр-дир мен.
Төөгүлерде амыдырал аайы-биле бедик-чавыс, шыргай-ажык, өл-кургаг дээш оон-даа хөй белен эвес үелер кандыг-даа чоннарга таваржып турганы кымга-даа чажыт эвес. Амгы үеде эки-багай байдалдарда чонувустуң таваржып турары сагышты бо-ла дүвүредип келир-дир.
Өгбелеривис боду бүткен каас-байлак оран-черлеривистиң ээлериниң күчү-күштүүн билип, ону биске камнап, хумагалыг арттырып каанынга мөгейип, канчаар-даа аажок өөрүп, кайгап ханмас-тыр мен. Оон аңгыда сүзүк-чүдүлгези, сагыш-сеткил культуразы, ёзу-чаңчылдары, иштики делегейи делгем чараш чорааны чоргааранчыг.
Хүндүлүг чонум, бүгү талазы-биле төөгүвүстен эки чүүлдерни шиңгээдип, кожа-хелбээ чоннарывыстан болгу дег эки чижектерни үлегерлеп тургаш, келир салгалдарга амыдыралдың чырык-чаагай байдалдарын, бот-боттарывыс демнежип тургаш, эки орукче углап каар бис дээрзинге бүзүрээр-дир мен.
Бот-боттарывысты камнажып, карактажып, деткижип чоруурунче кыйгырдым!
