Ийи муң тос чүс ажыг кижи амбулаторлуг-диагностика төвүнге МРТ-шинчилелдерин эрткен

2026 чылдың эгезинден бээр Тываның 2915 чурттакчызы республиканың консультативтиг-диагностика төвүнге бедик технологиялыг магнит-резонанс томографиязын эрткенин ТР-ниң Кадык камгалал яамызы дыңнаткан.

«Узун болгаш идепкейлиг назын» национал төлевилел-биле, республиканың чурттакчы чонунга эмчи шинчилгезиниң шынарын бедидер дээш амгы үениң дериг-херекселин ажыглалче киирген.

Магнит-резонанстыг томография (МРТ) аргазы диагностика салырынга эң дээштиг хевирниң бирээзи. Ол мээниң, чүннүң, хендирбе сөөгүнүң, чүстер болгаш иштики органнар аарыгларын баштайгы чадазында, шын илередир арганы бээр.

Эмнеп турар эмчизиниң бижии-биле албан камгаладылга хуудузун көргүскеш, МРТ-ни халас эртип болур.

Сөөлгү чылдарда регионнуң кадык камгалалы национал төлевилелдер шугуму-биле техниктиг эде чаартылгаларны шалыпкын чорудуп эгелээнинден, чурттакчыларга бедик технологиялыг ачы-дуза чедирилгези чедингир апарганын демдеглезе чогуур. Ынчангаш хөй шинчилгелер эртип алыр дээш, Тывадан дашкаар чорууру ам албан эвес апарган.

Кадык камгалал сайыды Михаил Мурашко РФ-тиң Чазааның Даргазы Михаил Мишустин база Тываның Баштыңы [id360104045|Владислав Ховалыг] Ховалыг-биле кады республиканың амбулаторлуг-диагностика төвүнге чорааш, ол эки талаже өсерлиишкиннерни демдеглээн. Сөөлгү каш чылдарда республиканың амбулаторлуг-поликлиника адыры 700 ажыг санныг амгы үениң дериг-херекселин база 50 хире автомашинаны алган.

Михаил Мишустин төпте салган даштыкы томографты база хынаан. Чазак Даргазы кадык камгалал сайыды Михаил Мурашкодан чуртка бүдүрген МРТ аппарадының байдалын айтырган. Мурашко Росатом ону үндүрер дээш ажылдап турарын дыңнаткан. «Билир мен. Росатом кажан биске ону аазаан ийик? Ажылдар кажан доостурул?» – деп, Чазак Даргазы сонуургаан. Мурашко «келир чылын кылыптарын аазаан» деп тайылбырлаан. «Дараазында чылда боттарывыстың магнит-резонанстыг томографиявыс турар ужурлуг» – деп, Мишустин даалганы берген.