Улуг-Хем кожууннуң Ийи-Тал сумузунда ажыл-биле бот-хандыртынган сайгарлыкчыларның бирээзи – Март-оол Хунажык. Ол социал керээге үндезилээн күрүне деткимчезиниң ачызында эът ыштаар цехти ажыдып алганын кожууннуң чагырга чери дыңнаткан.
Биче бүдүрүлгениң байырлыг ажыдыышкынынга ТР-ниң көдээ ажыл-агый сайыдының бирги оралакчызы Олег Чангы-оол, кожууннуң чагырга чериниң даргазы Буян Балбак киржип, «кызыл кожааны» кескен соонда, эгелеп чоруур сайгарлыкчының ыштаан хой эъдин амзааннар.
– Эъттиң чаагай болуру – амдан киирер холуксаалар холаан маринадындан кол хамааржыр. Эътти аңаа ийи азы үш хонук тургускаш, алды шак дургузунда ыштаар. Хой, хаван, дагаа эъдин, тыва чемивис – тыртканны ыштап шенедивис – деп, эгелеп чоруур сайгарлыкчы өг-бүле ажылын таныштырган.
Эът ыштаар цех бажыңының бир өрээлинде. Ында аңгы үнүп-кирер эжикти тургускан. Март-оол биле Чодураа Хунажыктар чылый бээри билек цехти улгаттырып, немей өрээлди тудуп алыр сорулгалыг. Ол ышкаш немей балык ыштаар дериг-херекселди база садып алыр күзелдиг.
Эът ыштадып алыр күзелдиг ийи-талчылар баш бурунгаар бижидип эгелей берген.
Кожууннуң төвү Шагаан-Арыгда балык ыштаар цехтен аңгыда, бо бир дугаар эът ыштаар цех болуп турарын кожууннуң чагырга чери дыңнаткан.
