Чалыы дайынчы Сотпа Шалганның ада-иези оглунуң чырык адынга тураскаадып, ооң мага-бодун шуткаан тураскаалды Улуг-Хем кожууннуң Ийи-Тал сумузунда аграр школаның девискээринде дүүн ажытканын чагырга чери дыңнаткан. Тураскаалды билдингир чурукчу Радомир Балган шуткуп кылган.
Сотпа Шалган Донецк Улус Республиканың Покровск угланыышкынынга шериг албан-хүлээлгезин эрттирип тургаш, эрес-дидимин көргүскен. Ол сөөлгү дайынчы даалгазында бөлүүн баштап чораан. Ооң дайынчы кыйгы ады «Шаман».
Дайзыннар ужудукчу чок аппараттан российжи шериглерниң бөлүүн көрүп кааш, бомбалап эгелээн. Бир дугаарында чазыпкан, ийи дугаарында олар часпас деп чүүл шупту дайынчыларга билдингир турган. Сотпа Шалган дайзынның кичээнгейин бодунче угландырып, ажык шөлче үне бергеш, маадырлыы-биле амы-тынындан чарылган. Чаныш-сыныш чок, эрес-дидим чүректиг дайынчы ынчалдыр хөй эштерин камгалаан.
«Оглум чажындан тура шериг херээн сонуургаар турган. 18 харлапкаш ол дораан шериг комиссариадынче боду чеде берген. Ынчалза-даа чүрээнде аарыының уржуундан, ол комиссияны эртпээн. Мен ажылым аайы-биле сургакчылаашкын чоруй баарымга, бүдүү керээни чаргаш, тускай шериг операциязынче чорупкан болган” – деп, Сотпа Шалганның авазы чугаалаан.
Маадырны «Эрес-дидим чоруу дээш» орден-биле мөчээн соонда шаңнаан.
