Ипотека чээлизинге субсидия алыр “кызыл дипломнугларның” даңзызын көвүдеткен

Тывада “кызыл дипломнуг” аныяк специалистерге күрүне деткимчезиниң программазынче аграр, культура болгаш уран чүүл дээди өөредилге черлериниң доозукчуларын, аныяк эртемденнерни даңзыже немей киирген.

Чиигелде алыр аныяктар санынче агроном, агрохимик, агроэколог, агроинженер, ветеринар, зоотехник, көдээ ажыл-агый бүдүрүлгезиниң технологу, аныяктар политиказының, культура болгаш уран чүүл, эртем адырында специалистер кирген.

Республиканың эрге-чагыргазы 2013 чылдан бээр ол программа боттаныышкыны-биле, регионнуң экономиказынга херек мергежилдерни тергиин өөредилгелиг дооскан кижилерге саң-хөө деткимчезин берип турар. Тывага эргежок херек ындыг мергежилдер саны 68 турган болза, ам ооң даңзызы 79 четкен.

Тускай комиссия мөөрейге даянгаш, программаның киржикчилерин шилиир. 35 хар чедир назылыг, Тывага херектиг болурда, 79 мергежилдерниң бирээзинге дээди өөредилге черин тергиин кылдыр дооскаан кижилер мөөрейге киржип болур.

Кордакчы кижи республика девискээринде бүрүткеткен, организацияларга алды айдан эвээш эвес хуусаада ажылдаан, регионда хуулар немелдези база район хуулары-биле кады үш эң кудуку шалың төлевирден эвээш орулгалыг болур ужурлуг.

Программа киржикчизинге бээр субсидияның хемчээли 500 муң рубльден көвүдевес. Беш чыл дургузунда, айда-ла 5,4 муң хире рубльди төлээр. Республикада чуртталга бажыңы садып азы тудуп алырынга ипотека чээлизиниң керээзи езугаар чээли акшазын ажыглааны дээш, хууларын төлээр чарыгдалдарның кезик чамдыызын эгидеринге ол акшаны угландырар.

ТР-ниң Аныяктар херектериниң талазы-биле агентилелдиң дыңнатканы болза, 2013-2021 чылдарда программага 195 “кызыл дипломнуг” аныяк тускай мергежилдиглер киришкен, оларның 123-ү субсидияны алган. Республика бюджединден ниитизи-биле чеди сая хире рубльди үндүрген.

2022 чылда ол программадан төлевирлерни 77 кижи алган.
«Кызыл дипломнуглар» даңзызын көвүдеткенинден, айыттынган чиигелдени алыр киржикчилер саны каш катап көвүдээри чадавас. Республика Чазаа 6,6 сая ажыг рубльди ында салган, ол дээрге тос чыл иштинде программа күүселдезинче чараан хире түң болуп турар.