Тываның Баштыңы Владислав Ховалыг Чөөн-Хемчик кожуунга ажыл албан аайы-биле чорааш, Үстүү-Хүрээ хүрээде эде чаартылга ажылдарын көрүп четкен.
IV делегей чергелиг сарыг шажын шуулганның бүдүүзүнде бо төөгүлүг черде чаартылга ажылдарын чорудары планнаттынган. «Эрткен чүс чылда чиде бээр часкаш, бөгүн катап тургустунуп, бистиң республикада эң-не ыдыктыг черлерниң бирээзи болуп арткан» – деп, Владислав Ховалыг МАХ-ка бижээн.
Амгы үеде шуулганга белеткелдер чоруп турда, эксперттер ам кылыр чаартылга ажылдарының дөзевилелин өөренип көрүп турар. Кылыр ажылдың кол сорулгазы – эрги болгаш чаа аян-шинчилерни чаңгыс комплекс кылдыр каттыштырары. Хүрээже чедериниң таарымчалыг аргаларын ажылдап, брусчатканы чадып, чаагайжыдар черлерни тодараткан. Төөгүлүг черде бүгү-ле ажылдарны сарыг шажынның шыңгыы чуруму езугаар чорударын Владислав Ховалыг демдеглээн.
Эрги хүрээ ханаларын кичээнгейлиг камнаарынче онза кичээнгейни углаар. Бойдустуң болгаш кижиниң багай салдарындан оларны камгалап, быжыглаары чугула. «Тываның Камба-Лама эргелели-биле кады сүмележип тургаш, шупту шиитпирлерни хүлээп алыр» – деп, Баштың демдеглээн.
Кожууннуң эрге-чагыргазы болгаш сагыш човангыр чурттакчылар хүрээни долгандыр девискээрни чаагайжыдары идепкейжээн. Оларның кады күжениишкиннери-биле шуулган киржикчилеринге чүдүп сүзүглээр болгаш таарымчалыг байдалды тургузуп турар. Аалчы бүрүзүнге таарымчалыг болзун дээш, айыыл чок чоруктуң айтырыгларын шиитпирлеп, аай-дедир аргыжарының хевирлерин сайгарып көрген.
