Тываның А.С. Пушкин аттыг национал ном саңының чурт-шинчилел чогаалы болгаш национал библиография килдизиниң ажылдакчылары Кызылдың Чурукчулар бажыңынга «Тываның амгы үениң уран-чечен болгаш каасталга уран чүүлүнде сарыг-шажынның темалары болгаш овур-хевирлери» республика чергелиг мөөрейниң тиилекчилериниң ажылдарының делгелгезиниң ажыдыышкынының үезинде «Тываның уран чүүлүнде сарыг шажын аяннары болгаш сюжеттери» деп ном делгелгезин салганын ном саңы дыңнаткан.
IV делегей чергелиг сарыг шажын шуулганынга тураскааткан ном делгелгезин келген улус сонуургап көрген.
«Тываның сарыг шажын уран чүүлү болгаш иконографиязы» (Кызыл, 2020), Хомушку М. В. «Тывада сарыг шажынның төөгүзү» (Новосибирск,2001), Серенот С. К. «Сарыг шажын хүрээлериниң тудуг уран чүүлү, каасталгалары болгаш лама башкыларның идик-хеви, эт-херекселдери» деп номундан «Тывада ховар шажын херекселдери»: авторнуң хуу шыгжамырында ховар бурганнар хевирлери болгаш шажын херекселдери деп эгени болгаш ат-сураа билдингир даш чонукчулары Х. К. Тойбухааның, Е. Дойнакайның, Э. Б. Байындының, Х. Б. Донгактың болгаш оон-даа өске даш чонукчуларының сарыг шажынга хамаарышкан ажылдарын болгаш Тывада билдингир чурукчуларның чураан чуруктарын, ылаңгыя В. Х. Сундуйнуң, Ч. Шойнуң сарыг шажын темаларынга чураан чуруктарын келген чон сонуургал-биле көрүп, танышканнар.
