Кызыл хоорайның соңгу талазын каастай хаажылай агып баткан күчүлүг Улуг-Хемни кежир туткан улуг көвүрүгнү Тываның найысылалы Кызыл хоорайның “эжииниң эргини” деп улус деңнеп чугаалажыр. Ынчангаш кызылчылар Улуг-Хем кежир көвүрүгнү чаартып, тыва кижиниң бедик хей-аъдының, сүлде-сүзүүнүң демдээ – аъттарның маны даштан дүрзү хевирин ында тургускан. Көвүрүгнүң ынды-бетии талазын, чоок-кавызын аянныг чараш кылдыр шимеп келгеннер.
Делегей чергелиг IV сарыг шажын шуулганның киржикчилери, аалчылары Тываның найысылалының “эжиин” ажыдып, “эргинин” артап моорлап келгеш, ооң каас-чаражын магадап көрзүннер дээш, чаартылга ажылдарын “Восток” кызыгаарлаттынган харыысалгалыг ниитилелдиң болгаш өске-даа организацияларның ажылдакчылары амгы үеде чорудуп турар.
Хоорайның төп кудумчуларының бирээзи Кочетов, көвүрүгнү кежилдир Абаканская болгаш Механизация кудумчуларның белдиринде долганыр оруктуң девискээринде септелге ажылдары кидин түлүк. Чаартылганың бо участогунда кылып чорудар ажылдарның хемчээли элээн улуг. Долганыр орукту, ооң биле Салчак Тока аттыг кудумчу аразында кудумчуларда оруктарны бүрүнү-биле септээш, ында дүнеки электри чырыткызының шугумун база чаарткаш, адагаштарга күштүг сайгылгааннарны азар.
Долганыр оруктуң ортузунда черниң оът-сигенин немей тарып өстүргеш, янзы-бүрү өңнерлиг чечектерни сарыг шажын шуулганның ужур-утказынга дүүштүр тарып олуртур.
Далганыр орукту, ооң-биле Салчак Тока кудумчунуң аразында кудумчуларда оруктарны асфальт-биле шывар, чадаг кижилер кылаштаар тротуарларны брусчатка-биле шывар.
Найысылал Кызыл хоорайның “эжиинде” болгаш “эргининде”, ооң чоогунда кудумчуларның, оруктарның септелгези-биле холбаштыр ол чоок-кавыда кварталдарда бажыңнарның чурттакчыларынга ыңай-бээр аргыжарынга түр када эпчок-даа болза, олар чурттап турар чери чараш-чаагай апаарынга өөрүп турарлар.
Ш. Моңгуш
