“Тывамедиагрупп” холдинг Бүгү делегейниң IV сарыг шажын шуулганынга тураскааткан улуг чогаадыкчы мөөрейни чарлаан.
Культуралар аразының харылзаазын быжыглап, шажын-чүдүлгениң өнчүзүн сайзырадырынче угланган IV сарыг шажын шуулганының белеткелдеринге хамаарыштыр Тываның төөгү-культурлуг эртинезин кадагалап арттырарынга болгаш нептередиринге тураскааткан улуг мөөрейни чарлаан. Ооң сорулгалары – чоннуң сүлде-сүзүүнүң байлаан бедидери болгаш регионнуң культурлуг чаңчылдарын өөрениринче болгаш нептередиринче аныяктарны болгаш хөй-ниитини хаара тудары.
Удавас болур IV сарыг шажын шуулганынга уткуштур Тываның сүзүктүг черлери болгаш сарыг шажынның ыдыктыг им-демдектери, дүрзү-хевирлери-биле холбашкан билдинмес төөгүлерни, тоолчургу чугааларны, угаадыгларны, хууда сактыышкыннарны чыырынче угланган онзагай мөөрейни чарлаан.
Субурганнар, хүрээлер, суургалар, күчү-күштүг черлер, дагылгалыг арт-сыннар, аржаан-суглар дугайында болгаш регионнуң сүлде-сүзүктүг амыдыралы болгаш культуразы-биле холбашкан бүгү чүүлдер дугайында чугаалар улусчу архивтиң бир кезээ болуп, келир салгалдарның соруун бедидер.
Тываның сүлде-сүзүглелиниң өнчүзүнге тураскааткан мөөрей 2026 чылдың июль 31-ге чедир уламчылаар. Хемчегниң башкарыкчылары республиканың чурттакчыларын болгаш аалчыларын регионнуң сарыг шажын болгаш ыдыктыг черлери-биле холбашкан онзагай төөгүзү, тоолчургу чугаалары, сактыышкыннары-биле үлежиринче чалап турар.
Ажылдарны орус-даа, тыва-даа дылдарга хүлээп алыр. Чырыдып турар объектизиниң ады болгаш турар чери тодаргай айыттынган болур ужурлуг.
Мөөрейниң киржикчилери кайгамчык шаңналдарны чаалап алыр аргалыг. Тиилекчилерге бирги чер дээш амгы үениң Smart TV телевизорну; ийиги чер дээш өңгүр смарт-телефонну; үшкүзүнге эптиг планшетти тыпсыр.
Бо мөөрей Тываның байлак культурлуг өнчүзүн кадагалап арттырарының аргазы болурундан аңгыда, республиканың чурттакчыларының ортузунга бодунуң регионунуң төөгүзүнче сонуургалын оттурар арга болур.
Чыгдынган материалдарны культура-чырыдыышкынныг ажыл-чорудулгага, аян-чорук адырынга болгаш чүдүлгениң езу-чаңчылдарын нептередиринге ажыглаар.
Биске катчыңар! Тоолчургу чугааларыңарны, сактыышкыннарыңарны чугаалап, онзагай төөгүлер-биле үлежип, Тываның сүлде-сүзүүн кадагалап арттырарынга дузалажыңар. Силерниң төөгүңер – бистиң ниити өнчүвүстүң бир кезээ-дир.
Ажылдарны tmg2026@yandex.com. чорудар. Харылзажыр телефоннары: 8 (394-22) 3-36-19, 3-00-12.
