Тываның Көдээ ажыл-агый яамызының сан-чурагайы-биле алырга, республикада 1832 баш иви бар.
Адыр-Кежиг сумузунда «Тожу» көдээ ажыл-агый бүдүрүлгезиниң кооперативи тургустунган. Мооң мурнунда «Өдүген» муниципалдыг унитарлыг бүдүрүлгени эде тургусканы ол.
Ивижилерни кооперативтерже каттыштырары оларга чаа хевирниң деткимчелерин база эки түңнелдерни чедип алырынга арганы тургузар. Чижээлээрге, бо чылын иви ажыл-агыйының бир киржикчизи «Агростартап» федералдыг төлевилел-биле күрүне деткимчезин алган.
ТР-ниң Көдээ ажыл-агый яамызы Күш-ажыл яамызы таварыштыр бот-идепкейжи ивижилер-биле социал керээге үндезилээн күрүне деткимчезин алыр керээлерни чарып, иви малдың баш санын өстүрер тускай төлевилелдерни боттандарырар аргаларны өөренип турар.
Бир баш иви дээш субсидияның түңү 3000 рубльге чедир өскенин сагындыраал. Бо бүгү күрүне деткимчези иви малдың баш санын өстүреринче көрдүнген.
