Тываның А. С. Пушкин аттыг национал ном саңының чурт-шинчилел чогаалы болгаш национал библиография килдизинде Тыва Республиканың алдарлыг башкызы, чогаалчызы чораан Көк-оол Чамыяңның 95 харлаанынга «Көдээ амыдыралдың алгакчызы» деп номнар делгелгези салдынганын ном саңы дыңнаткан. Ында чогаалчының номнарын, намдары болгаш ажыл-ижиниң дугайында материалдарны делгээн.
Көк-оол Топуевич 1931 чылдың февраль 5-те Тыва Арат Республиканың Тес-Хем кожууннуң Орукку-Шынаага төрүттүнген. Чайлаг школазының эге клазынга, Самагалдайның чеди чыл школазынга, Кызылдың башкы училищезинге өөренгеш, Күрүнениң башкы институдунуң төөгү, дыл факультедин дооскан.
1974 чылда К.Т. Чамыяңның «Чаңгыс аалдың кижилери» деп баштайгы ному үнген. Дараазында чылдарда «Кыштагда чырык» (1977ч.), «Ханы дазыл» (1981ч.), «Часкы хөөннер» (1984ч.), «Мөңгүн оттук» (1998ч.), «Хаяа» (2001ч.) база В. Чукрееваның очулгазы-биле «Кыштагда чырык» (1989ч.) деп номнары үнгүлээн.
Чурт-шинчилел чогаалы болгаш национал библиография килдизи номчукчуларны номнар делгелгезинче база чогаалчыларның солун тоожуларын, чечен чугааларын кээп номчуурунче чалап турар.
