Каа-Хем кожууннуң Кундустуг сумузунда “Көдээ черлерниң комплекстиг хөгжүлдези” күрүне программазының “Албан чериниң чуртталга бажыңы” төлевилелдиң чорудуу-биле бир дугаар чаагайжыттынган бажыңны ажыглалче кииргенин чагырга чери дыңнаткан.
Чаа чыл бүдүүзүнде англи дыл башкызы Снежана Иргитке «алдын дүлгүүрнү» байырлыг байдалга тывыскан. ТР-ниң өөредилге сайыдының хүлээлгезин күүседип турар Ренат Ооржактың дыңнадып турары-биле алырга, бо чылын Каа-Хем, Чаа-Хөл болгаш Чеди-Хөл кожууннардан үш башкы албан чериниң чуртталга бажыңының дүлгүүрлерин алган.
“Албан чериниң чуртталга бажыңы” төлевилелдиң ачызында көдээ черлерде ажылдап турар тускай мергежилдиглер оран-бажыңының байдалын экижидип алыр аргалыг.
Кундустуг школазында “Орус географтыг ниитилелдиң булуңу” база ажыттынган. Тыва салбырның даргазы Кара-кыс Аракчаа, күүсекчи директору Эдгар Байкара, кежигүнү Светлана Курбатская, Харалгазыкчылар чөвүлелиниң кежигүнү Елена Астафьева байырлыг ажыдыышкынга киришкен.
Келир чылын март айда ук школа тургустунганындан бээр 105 чылын демдеглээр. Өөредилге чериниң директору – Клавдия Давалай.
