Тываның Өөредилге яамызы «Көдээ черниң башкызы» программазынга киржир школа башкылар шилилдезиниң мөөрейинче билдириишкин хүлээп алыышкынын апрель 30-де доозар, ооң мурнунда апрель 15-те доостур турган. Мөөрейниң негелделери езугаар тиилекчилер бир сая рубль хемчээлдиг акша компенсациязын алыр.
Тываның Баштыңы Владислав Ховалыг көдээ черлерже шыырак тускай мергежилдиглерни хаара тударынга программаның чугулазын ооң мурнунда демдеглээн.
2026 чылда «Көдээ черниң башкызы» программаже 25 сая рубльди республика бюджединде тускайлаан. Ынчап кээрге бо чылын мөөрейге 25 башкыны шилип алыр. Яамының дыңнатканы болза, школаларга 8 математика, 6 англи дыл башкызы, 3 орус дыл болгаш чогаал башкызы, 2 биология, 2 физика башкызы, төөгү, химия, информатика, эге класстарга бир-бир башкы херек.
Мөөрей барык шупту Тываны – Тээли, Хөнделең, Хайыракан, Үжеп-Аксы, Хөндергей, Шамбалыг, Элегес-Аксы, Солчур, Аржаан, Хүт, Кызыл-Тайга, Балгазын, Самагалтай, Чыргаланды, Адыр-Кежиг, Арыг-Үзүү, Иштии-Хем, Торгалыг, Хайыракан (Улуг-Хем), Чаа-Хөл, Бай-Даг, ол ышкаш Шагаан-Арыг база Ак-Довурак школаларын хаара тудар.
Мөөрейниң организакчылары кордакчылар хөйүн дыңнаткан. Апрель 22-ге чедир мөөрейге киржир дээш 181 кижи билдириишкин киирген. Оларның чүгле үштүң бир кезии шилилге комиссиязынче херек бөлүк документилерин дужааган болганда, шилилгени апрель 30-ге чедир узадыр шиитпир хүлээп алдынган.
«Көдээ черниң башкызы» мөөрейниң дүрүмү-биле алырга, 50 муңдан эвээш чурттакчылыг суурларже көжүп, ажылдаар күзелдиглерни шилип алыр. Программаның киржикчи бүрүзүнге беш чылдан эвээш эвес үе дургузунда шилип алган школазынга албан ажылдаар болгаш бир сая рубльди алыр.
