2025 чылда кадык камгалал шугумунуң кадрлар курлавырын быжыглаарынче угланган «Көдээ черниң эмчизи/Көдээ черниң фельдшери» программа-биле, республиканың суурларынче 34 кижи – 31 эмчи болгаш үш фельдшер ажылдап чоруткан.
Тожу, Барыын-Хемчик, Таңды, Чаа-Хөл, Өвүр, Эрзин, Сүт-Хөл дээш, оон-даа өске кожууннарның көдээ суурларынче эмчилерни хувааган. Оларның аразында 7 терапевт, 5 хирург, 5 педиатр, 4 фтизиатр, 2 невролог, 2 диш эмчизи, ол ышкаш психиатр-нарколог, анестезиолог-реаниматолог, инфекционист, отоларинголог, кардиолог, травматолог-ортопед эмчилер бар. Оон аңгыда үш фельдшер Адыр-Кежиг, Алдан-Маадыр, Шивилиг суурларда фельдшер-акушер пунктуларында эмчи дузазын көргүзүп, ажылын эгелээн.
«Көдээ черниң эмчизи» программа-биле тускай эртемниг 10 эмчи республика бюджединден бир сая рубль хемчээлдиг чаңгыс катап бээр компенсация төлевирин алган. Беш чыл дургузунда чылдың-на 200 муң рубль түңнүг төлевир бээр практика база уламчылавышаан. 2025 чылда ол төлевирлерни республикада медицина организацияларында ажылдап турар 235 эмчи алган.
ТР-ниң Кадык камгалал яамызы аныяк тускай мергежилдиглерни хаара тударында идепкейлиг ажылдап турар. 2025 чылда медицина дээди өөредилге черлериниң 63 доозукчузун ажылче киирген, оларның аразында ординатура дооскан 41 эмчи, специалитет дооскан 18 эмчи база дөрт стажтыг эмчи бар. Оон аңгыда ортумак медицина эртемниг 201 тускай мергежилдиг республиканың кадык камгалал албан черлеринде ажылда тургустунган.
Бо чылын «Көдээ черниң эмчизи» программа-биле Таңды кожууннуң төп эмнелгезинде арга-дуржулгалыг фтизиатр эмчи, кадык камгалал организакчызы Долаана Ховалыг ажылдап келген.
«Туберкулезту илереткени дээрге, бо халдавырлыг аарыгга удур демиселдиң чүгле эгези-дир, чүге дизе аарыгны эртежик илереткеш, халдавырның улаштыр дамчыырын үзе шаварынга магадылал улгадыр» – деп, Долаана Анатольевна чугаалаан.
Долаана Ховалыг 1999 чылда эмчи бүрүткекчизи база эмчи сестразы болуп фтизиатрия албанынга ажылчын базымнарын эгелээн. Оон Иркутскиниң күрүнениң медицина университедин дооскаш, фтизиатр эмчи болгаш туберкулезка удур диспансерниң кол эмчизиниң оралакчызында ажылдаан.
