«Көдээ черниң тренери» программа-биле Тываның суурларында 14 тренер башкы ажылче тургустунган

Тывада «Көдээ черниң тренери» программа боттаныышкыны уламчылап, республиканың биче суурларында тускай мергежилдиг 14 тренер башкыны ажылче хаара туткан. Олар көдээ суурларга ажылдаар күзелин илередип, спорттуң аңгы-аңгы хевирлери – сумо болгаш бут бөмбүүнден эгелээш, баскетбол болгаш хол бөмбүүнге чедир спортту сайзырадырынга белен чоруун көргүскени, эки эгелээшкин.

Россияның Президентизиниң даалгазы-биле ажылдап кылган «Көдээ черниң тренери» программа бо чылын республикага ажылын эгелээнин сагындыраал. Тренер башкылар беш чылдан эвээш эвес үеде ажылдаар негелде-биле, чаңгыс катап бээр бир сая рубль акша деткимчезин алырлар. Бо арга оларны хаара тударындан аңгыда, профессионал тренерлерге улуг хереглелдиг бичии суурларга ажылдап артып каарын быжыглаар.

Тываның Баштыңы [id360104045|Владислав Ховалыг] республиканың суурларынга спортту хөгжүдери чугула дээрзин чаңгыс эвес удаа демдеглээн. «Көдээ инфратургузугну, ооң иштинде социал адырны хөгжүдеринче угланган федералдыг программаларга идепкейлиг киржип, боттарывыстың регионалдыг эгелээшкиннеривисти ооң-биле чергелештир боттандырып турар бис. Бичии суурларже мергежилдиг тускай мергежилдиглерниң келири чүгле спорттуң хөгжүлдезинге эвес, а суурларда амыдыралдың шынарын ниитизи-биле бедидеринге улуг рольдуг» – деп, Владислав Ховалыг демдеглээн.

ТР-ниң Спорт яамызының дыңнатканы-биле алырга, төлевилел күүселдезинде амгы үеде 10 хостуг олут арткан. Күш-культура болгаш спорт талазы-биле ортумак профессионал азы дээди эртемниг тускай мергежилдиглер көдээ черлерге тренерлеп ажылдап болур.

Кызылдың Калинин кудумчузунуң 11 дугаар бажыңында Тываның Спорт яамызынга чеде бергеш, херектиг доментилерни дужаап болур.

Тывага «Көдээ черниң тренери» программаның күүселдези «Россияның спорту» күрүне программазының сорулгаларын чедип алырынга улуг үлүг-хууну киирер.

2030 чылга чедир спортка доктаамал киржип турар российжилерниң үлүүн 70 хуу чедир көвүдедири – ооң кол сорулгазы. Аңаа онза рольду спортчу инфратургузугну хөгжүдеринче болгаш биче сурларны кадрлар-биле хандырарынче угланган эгелээшкиннер ойнап, кижиниң чурттап турар черинден хамаарылга чокка, ону эптиг болгаш чедингир кылыр.