Суг-Аксының культура одаанга Сүт-Хөл кожууннуң эрес-кежээ малчыннарын, араттарын, тараажыларын көдээ ажыл-агый болгаш болбаазырадылга үлетпүрүнүң ажылдакчызының хүнүн таварыштыр оларның чымыштыг ажыл-ижин үнелеп, алгап-мактаан байырлыг концерт болуп эрткенин чагырга чери дыңнаткан.
Кожууннун удуртулгазы шылгараан көдээ ишчилерни демдеглеп, шаңнап-мактаан. «Саян» көдээ ажыл-агый бүдүрүлге кооперативиниң комбайн башкарыкчызы С. С. Монгушка Алдан-Маадырларның тура халыышкынындан бээр 140 чыл оюнга тураскааткан юбилейлиг медальды тывыскан.
Сүт-хөлчүлер тус черниң көдээ ажыл-агый бараан бүдүрүкчүлериниң ярмарказындан сүт, эът аймаан, мал чемин дээш көдээ ишчилерниң бүдүрген бараннарын тып, таарымчалыг өртекке садып алганнар.
Кожуунда 930 хууда дузалал ажыл-агыйы, 103 ажыг тараачын-арат ажыл-агыйы бар.
Тываның Чазааның чарлааны мал чемин белеткээр шалыпчы айларда эң-не эки көргүзүглерни Сүт-Хөл кожуун чедип алганын сагындыраал.
