Эъжимниң малчыны Сергек Мижит-Доржу чылдың-на май 1 байырлалының дыштаныр хүннеринде теве кыргылдазын эрттирип турарын чагырга чери дыңнаткан.
Чаңчыл езугаар бо чылын Алена биле Сергек Мижит-Доржуларның аалчынга төрел-аймаа чыглып, демнии-биле теве кыргылдазынга киришкен.
Бир баш теведен ортумаа-биле 7-8 кил дүктү кыргып ап турар. Алена Каадыр-ооловна теве дүгү хереглээн улуска берип, боду база дүктү дыдып, ээргеш, дискекке кедер, оорга чылыглаар белдиргиишти аргып турар. Ол чоорту дүк болбаазырадыр бичии цех ажыдып алыр бодалдыг.
2023 чылда Сергек Мижит-Доржу Калмыкияның Юстинск районунда Бергин деп суурда теве азырап турар «Полынный» кызыгаарлаан харыысалгалыг ниитилелден 20 тевени саткаш, эккеп алган. Үш чылдың дургузунда тевелер оолдап, баш саны өзүп турар. Бо чылын чеди эңгин төрээн, оолдары доругуп келген.
Улуг-Хем кожууннуң мал эмчизи Начын Хойлапай тевелерниң ханын ап, доктаамал хынап турар. Малды шуптузун «Хорриот» системазынче киирген. Ол ышкаш ящур, чума аарыгларынга удур камгалал тарылганы чоруткан. Бо чазын тевелерге сибирь язвазынга удур камгалал тарылганы, бодаганнарга витаминнерни салган.
