Барыын-Хемчик кожуунунуң тургустунганындан бээр 100 чыл оюнга тураскааткан "Буянныг 100 ажыл-херек" деп акцияга "Мажалык" чечен чогаал каттыжыышкыны болгаш Салим Сүрүң-оол аттыг төп ном саңы катчып, Актың Үзүк-Аксында Тываның Улустуң чогаалчызы Салим Сазыгович Сүрүң-оолдуң төрээн чери, көк-көк даглар аразында тураскаалының девискээрин чаагайжыдып, ооң чанында чаа чараш дыштаныр черни кылып тургусканын каттыжыышкын дыңнаткан.
Шывыглыг дыштанып олурар черниң төлевилелин шевер аныяк башкы, "мажалыкчы" Омак Ооржак кылып белеткээн. Дыштанып олурар черниң ийи кыдыын каастаан аът баштары чогаалчының төрээн черинде Ак-Аскыр, Доруг-Аскыр деп хемнер аттары-биле холбаалыг деп тайылбырлап турар. Эң кырында өг – "мажалыкчыларның" чогаадыкчы өг-бүлези, а ооң чандаңындан үнген алдын бийир уран чечен, чогаадыкчы ажыл чорудулганы илереткен.
Чечен чогаал каттыжыышкыны кожуун чагыргазынга, ном саңының удуртукчузу Аяна Агбаанга тудуг материалдары-биле дузалашканы дээш четтиргенин илереткен.
